Փաստ ինֆո

ՀՀ վարչապետ Նիկոլ Փաշինյանն այսօր տեղեկացրել է, որ վաղը կառավարության նիստի ժամանակ 5 փաթեթ է ընդունվելու, որով կառավարությունը քաջալերելու է, որ բիզնեսը աշխատողների աշխատավարձերը տա, խրախուսելու է այն բիզնեսմեններին, որոնք աշխատատեղերը չեն կրճատում ու մարդկանց աշխատավարձերը վճարում ե։ Սոցիալական աջակցության փաթեթ է ընդունվելու այն երեխաների համար, որոնց ծնողներն արտակարգ դրություն հայտարարելուց հետո կորցրել են իրենց աշխատանքը։ Փաշինյանը տեղեկացրել է, որ այս երեխաների համար կառավարությունը 100․000 դրամ աջակցության փաթեթ է տրամադրելու։

«Ամենօրյա ռեժիմով իմ գլխավորությամբ տեղի է ունենում խորհրդակցություն, որտեղ մենք ձեր նշած բոլոր սեգմենտները քննարկում ենք։ Բոլորին աջակցելու ենք հերթով։ Բայց ասում եմ, հասցեական աջակցելու ենք նրանց, ովքեր մրցունակ, պարտաճանաչ, քաղաքակիրթ, օրինական բիզնես ու հեռանկար ունեն։ Այն ընկերությունները, որոնք եթե անգամ կորոնավիրուսը չլիներ այսպես թե այնպես փակվելու էին, դրանց աջակցելու որևէ իմաստ չկա»,-ասաց Փաշինյանը։

Վարչապետի խոսքով, պատգամավորների հարցերից այնպիսի տպավորություն է, որ ամբողջ աշխարհն ապրում է իր բնականոն կյանքով, պայմանագրեր են կնքվում, արտադրական պրոցեսներ կան, իսկ կորոնավիրուսը մտել է Հայաստան ու «ազնիվ մեր ցեղը կորչելու է զուր տեղը»։

ԱԺ «Լուսավոր Հայաստան» խմբակցության պատգամավոր Տարոն Սիմոնյանը պատասխանելով վարչապետի այս դիտարկմանն ասաց․ «Թույլ տվեք ընդգծել, որ 4 տասնյակ պետություններում է այս իրավիճակը, սակայն աշխարհում կա մոտավորապես 200 պետություն, և մնացած պետությունները մեծ հաճույքով պատրաստ են այս 4 տասնյակ պետություններում առկա պատվերները վերցնել։ Որպեսզի մենք այնպես կազմակերպենք աշխատանքը, որ չկորցնենք արտադրության ոլորտը, որոշակի մարտավարական քայլեր պետք է անենք»։

Սիմոնյանն ընդգծեց, որ Փաշինյանի պատասխանից այնպիսի տպավորություն է՝ լավ չեն անում պատգամավորները, որ հարց են տալիս։

«Ես ներողություն եմ խնդրում, եթե հերքեմ Ձեր վիճակագրությունը, բայց այսօր աշխարհում պետություն չկա, որտեղ կորոնավիրուսի համաճարակը չի մտել։ Այնտեղ, որտեղ այնքան քիչ է կորոնավիրուսի քանակը, որ կարող են պատվերներ ընդունել, այդ երկրներում արտադրական հզորություններ չկան։ Ամենաքիչը վնասված են այն երկրները, որոնք մեզ հետ ընդհանրապես չեն կարող մրցակցել»,-ասաց Փաշինյանը։

Մանրամասները՝ տեսանյութում։

Աղբյուր` Փաստինֆո