Փաստ ինֆո

Ազգային ժողովը քննարկում է «Հեռուստատեսության եւ ռադիոյի մասին» Հայաստանի Հանրապետության օրենքում փոփոխություն եւ լրացումներ կատարելու մասին օրենքի նախագիծը։

Հիմնական զեկուցող Արդարադատության նախարարի տեղակալ Վահե Դանիելյանը նշեց, որ մինչև 2014թ-ը «Հեռուստատեսության և ռադիոյի մասին» օրենքում համապատասխան փոփոխություն կատարելը, Հանրային հեռուստաընկերությունն իրավունք է ունեցել առևտրային գովազդ հեռարձակել, ուրևէ չէր կարող գերազանցել հաղորդումների 7 տոկոսը և դրա արդյունքում առաջացել են ֆինանսական միջոցներ, որոնք Հ1-ն օգտագործել է իր կարիքների համար, սակայն 2015թ-ի հունվարի 1-ից ուժի մեջ մտած փոփոխությամբ Հ1-ը զրկվել է ֆինանսական միջոցներից և հետագա տարիներին կառավարությունը փորձել է մասնակի փոխհատուցել դրանք։

«Արդյունքում հնարավորություն չի եղել հեռուստաընկերության կողմից իր առաջ դրված խնդիրները լուծել և դիմակայել նոր մարտահրավերներին, ինչն իրենից ենթադրում է տեխնիկական վերազինում, եթերաժամի փոփոխություն և այլն։ Հետևաբար` սույն նախագծով սահմանվում է գովազդի իրավունքի վերականգնում, որը չի կարող տեղի ունենալ մեկ եթերաժամի հաշվարկով ավելի քան 5 րոպե, նաև կարգավորվում է սոցիալական գովազդի հետ կապված հարաբերությունները, սահմանելով, որ անվճար սոցիալական գովազդ կարող է լինել 00։00-ից մինչև 18։00, իսկ 18։00—ից մինչև 00։00 -ն կարող է լինել վճարովի սոցիալական գովազդ»,-ասաց Դանիելյանը։

Նա հայտնեց, որ պահպանվում է նաև հովանավորողների ինստիտուտը, ինչը ենթադրում է, որ կրթական, գիտական, սպորտային հաղորդումների ժամանակ հովանավորի վերաբերյալ կարող է հակիրճ տեղեկատվություն ներկայացվել, սակայն այն չի կարող գերազանցել հաղորդման 2,5 տոկոսը։

«Այս նախագծով գովազդի շուկայի ազատականացում է տեղի ունենում և ստեղծվում է հավասար հնարավորություն հեռուստաընկերությունների համար»,-ամփոփելով խոսքն ասաց նախարարի տեղակալը։

Աղբյուր` Փաստինֆո