Փաստ ինֆո

Վանաձորում սովորական մթնոլորտ է, խուճապային տրամադրություն չկա: Վանաձորի քաղաքապետ Մամիկոն Ասլանյանը «Փաստինֆո»-ին պատմեց ինչ է կատարվում քաղաքում արտակարգ դրության օրերին: Բնակիչներն արտակարգ դրության պայմաններին համապատասխան իրականացնում են իրենց գործունեությունը: Քաղաքապետի խոսքով՝ երեկ փողոցում զբոսնող մարդիկ էին շատ, սակայն քաղաքապետարանի հերթական հորդորից հետո այսօր արդեն իրավիճակն այլ բնույթ ունի:

Ինչ վերաբերում է տնտեսվարող սուբյեկտների գործունեությանը, Մամիկոն Ասլանյանը նկատեց աշխատում է միայն «Գլորիա» կարի ֆաբրիկան.

«Ֆաբրիկան կաշխատի այնքան ժամանակ մինչև կլինի պարետատան արտադրամասերը ժամանակավորապես փակելու վերաբերյալ որոշումը: Նրանք փաստաթղթավորված տարբերակին են սպասում, որպեսզի միջազգային գործընկերների նկատմամբ իրենց պարտավորությունները կատարելիս փաստաթղթային հիմնավորում ունենան: Պատվերների չմատակարարման հետ կապված հետագա խնդիրներից խուսափելու համար տնօրենն առավոտյան ֆաբրիկայի անձնակազմին հայտարարել է, որ կսպասեն պարետի համապատասխան որոշմանը ու կդադարեցնեն աշխատանքները: Իսկ մինչ այդ արտադրական ցիկլի կիսատ թողած գործերը կվերջացնեն»,-ասաց քաղաքապետը:

Անդրադառնալով ռեստորաններին և սրճարաններին Մամիկոն Ասլանյանն նկատեց դրանց մի մասն ավելի վաղ էին դադարեցրել իրենց աշխատանքները, իսկ մյուսները, բնականաբար, այսօր կդադարեցնեն:

Մամիկոն Ասլանյանը հավելեց՝ քաղաքում խնդիր կա հիմնականում տրանսպորտային կազմակերպությունների հետ կապված. «Ուղևորափոխադրումները պակասել են և գուցե հարկային խնդիրներ առաջանան: Առայժմ առարկայական խոսակցություն չկա, բայց օդում կախված նման տրամադրություններ կան»,-ասաց Վանաձորի քաղաքապետը:

Այս ընթացքում օգնություն ստանալու նպատակով քաղաքապետարան են դիմել քաղաքացիներ, անապահով ընտանիքներ: Մամիկոն Ասլանյանը նշում է, որ քաղաքապետարանի ունեցած հնարավորությունների սահմանում կազմակերպել են այդ օգնությունը: Մարզպետարանի, ինչպես նաև պարետատան հետ համատեղ մոտ 200 ընտանիքի սնունդով են ապահովել:

Հեղինակ՝ Հասմիկ Կոշկարյան

Աղբյուր` Փաստինֆո