Փաստ ինֆո

Ազգային ժողովը քննարկում է Հարկային օրենսգրքում լրացում կատարելու մասին նախագիծը, որի դրույթներից մեկի հետ կապված նախագծի հեղինակն ու կառավարությունը տարակարծություն ունեն։

«Խնդիր էր առաջացել 147-րդ հոդվածի հետ կապված, որով սահմանված են եկամտային հարկի գծով նվազեցվող եկամուտները, որոնց մասով եկամտային հարկ չի գանձվում, դրանց թվում են նաև ապահովագրական հատուցումները, սակայն գործնականում առկա է իրավիճակ, երբ բանկերն ու վարկային կազմակերպությունները գրավի առարկա հանդիսացող անշարժ կամ շարժական գույքի ապահովագրության ժամանակ հանդիսանում են շահառու, իսկ ֆիզիկական անձ վարկառուն՝ ապահովադիր, և նման դեպքերում բանկերն ու վարկային կազմակերպությունները ապահովագրական դեպքի արդյունքում առաջացած գումարները փոխանցում են կամ ֆիզիկական անձանց, կամ մարում նրանց վարկային պարտավորությունները»,-այս մասին այսօր նախագծի ներկայացման ժամանակ ասաց ԱԺ «Լուսավոր Հայաստան» խմբակցության պատգամավոր Մանե Թանդիլյանը։

Նա նշեց՝ հաշվի առնելով, որ այս պարագայում գումարները բանկերի և վարկային կազմակերպությունների միջոցով փոխանցվում են ֆիզիկական անձանց կամ մարում են նրանց վարկային պարտավորությունները, բովանդակային առումով ուղղակի ֆիզիկական անձանց վճարելու հետ համեմատած որևէ տարբերություն չկա։

«Վերջին հոդվածով նախատեսել ենք ուժի մեջ մտնելու դրույթը, այստեղ է, որ տարակարծություն ունենք Կառավարության մեր գործընկերների հետ։ Ես առաջարկում եմ, որ օրենքը, լինելով բարելավող նորմ, հետադարձ ուժ ունենա և տարածվի նաև այն նախկին հարկային պարտավորությունների վրա, որոնք արդեն այս օրենքով չեն հարկվելու ու դեռևս չեն վճարվել, ։ Կառավարությունը կարծում է, որ դրույթը պետք է տարածվի միայն ապագա գործարքների վրա, իսկ ես կարծում եմ, որ գործարքների քանակը այդպես ծավալուն չէ և գտնում եմ, որ արտակարգ դրության պայմաններում պետք է որոշակի գործընկերություն ցուցաբերել»,-ասաց Թանդիլյանը։

Նախագծի վերաբերյալ իր կարծիքը հայտնեց նաև ԱԺ Տնտեսական հարցերի մշտական հանձնաժողովի նախագահ Բաբկեն Թունյանը, ու նշեց, որ առաջին ընթերցման ժամանակ բոլորը Թանդիլյանի գաղափարն ընդունել ու ողջունել են։

«Ֆինանսների նախարարությունը փոփոխություններ է առաջարկել և դրանք հեղինակի կողմից ընդունվել են, այսինքն` շատ կառուցողական մթնոլորտում նախագիծը քննարկվել, ընդունվել է և ոչինչ չէր գուժում, որ նախագիծը բացասական եզրակացություն էր ստանալու, սակայն եղել է մի սկզբունքային կետ, տիկին Թանդիլյանի նշած դրույթը, որը հնարավորություն կտար այս մեխանիզմը նաև հետադարձ ուժով կիրառել»,-ասաց Թունյանը։
Նա նշեց, որ այս դրույթը նպատակահարմար չէ և որոշակի ֆինանսական ռիսկեր է առաջացնում։ Թունյանը հայտնեց, որ Թանդիլյանին առաջարկել են առանց այդ առաջարկի նախագիծը սկզբնական տարբերակով ներկայացվի, սակայն նա պնդել է, որ անպայման իր առաջարկով պետք է նախագիծն ընդունվի։
«Քանի որ կանոնակարգը թույլ տալիս է և ափսոս է, որ այս նախագիծը մեկ դրույթի պատճառով բացասական եզրակացություն ստանա, ես առաջարկում եմ այս տարբերակով ԱԺ-ն դեմ քվեարկի նախագծին, հեղինակն այն իջեցնի առաջին ընթերցում, նորից քննարկենք, եթե հաջողվի կոնսեսուսի գալ, ապա այս նախագիծն ընդունենք»,-ասաց Թունյանը։

Ֆինանսների նախարարի տեղակալ Արման Պողոսյանն էլ ավելացրեց, որ բավականին կառուցողական աշխատանք է կատարվել, այն առումով, որ հարցի քննարկմանը ներգրավված են եղել բանկերի միությունը, ապահովագրական ընկերությունները, առևտրային բանկերը և այլն։

«Իրապես կիսում եմ պարոն Թունյանի տեսակետն այն առումով, որ լավ կլինի, եթե կառուցողական որևէ ճանապարհ գտնվի և նախագծի կարգավորման առարկան իր լուծումը ստանա։ Ինչպես նշվեց, մեկ տարակարծություն ունենք։ Խնդիրն այն է, որ երբ մենք հետադարձ ուժ ենք տալիս առաջարկվող կարգավորմանը, ունենում ենք առնվազն անարդար իրավիճակներ հետևյալ առումներով՝ պատկերացրեք 2 բանկ, երկուսն էլ ապահովագրական հատուցումները վճարելիս եկամտային հարկը չեն հաշվարկել, չեն պահել որպես հարկային գործակալ, և երկուսի մետ էլ ստուգմամբ արձանագրվել է խախտումը։ Մեկը գտնվել է կարգապահ հենց հաջորդ օրը վճարել է, մյուսը մինչև օրս չի վճարել, և այս առաջարկով ստացվում է, որ մենք այդ երկրորդ կազմակերպությանը ներում ենք իր հարկային պարտավորությունը, բայց առաջին, որն ավելի կարգապահ է գտնվել, նրա վճարած գումարը չենք վերադարձնում»,-ասաց Պողոսյանը։

Աղբյուր` Փաստինֆո