Փաստ ինֆո

«Բաղրամյան»-ի փաթեթավորված ալյուրի գինը չի փոխվել: Այս մասին այսօր մամուլի ասուլիսի ժամանակ ասաց ՏՄՊՊՀ նախագահ Գեղամ Գևորգյանը անդրադառնալով ալյուրի գնի հետ կապված ահազանգերին:

«Փետրվարի 26-ից մինչև մարտի 3-ը եղել է 280 դրամ, մարտի 4-ից մինչև մարտի 14-ը եղել է 255 դրամի շրջակայքում, մարտի 15-ին բարձրացել է 270 և նորից վերադարձել է 255: Վերջին օրվա դրությամբ 260 էր: Ուղիղ կապի մեջ ենք ալյուրի խոշոր արտադրողի հետ, և նրանց մոտ թանկացում չի եղել: 1-2 դրամ մի քանի տեսակի ալյուրի մեջ թանկացել է կախված ձեռք բերված ցորենի գնի հետ»,-ասաց Գեղամ Գևորգյանը:

Նա հորդորեց ալյուրի գնի բարձրացման հետ կապված որևէ փաստ տեսնելիս լուսանկարել, ուղարկել հանձնաժողով և նշել, թե որ տնտեսվարող սուբյեկտի մոտ է դա տեղի ունեցել. «Եթե տեսնենք, որ օրինակ շենքի բակի խանութում է թանկացումը տեղի ունեցել, իհարկե, որոշակի միջոցներով կփորձենք հորդորել, որ դա տեղի չունենա, բայց նրանք այսպես թե այնպես մեր տիրույթում չեն գտնվում: Այդ բողոքների մոտ 90 տոկոսը, արձանագրված խնդիրները կոնկրետ խանութում նկարել են և ցույց են տվել, բայց գերազանցապես խնդիր չենք տեսել: Փաստը պետք է կոնկրետ արձանագրվի կամ հասցեն ասեն, որ գնանք ու նայենք»,-նշեց ՏՄՊՊՀ նախագահը:

Հանձնաժողովի կայքէջում և ֆեյսբուքյան էջում կհրապարակվեն «Նոր Զովք», «Երևան սիթի» հիմնական սպառում իրականացնող խանութների գրաֆիկական պատկերները այն ապրանքատեսակների մասով, որոնք ամենաշատն են սպառվում. «Երևանում միշտ եղել են որոշակի կատեգորիայի սուպերմարկետներ, որոնք ավելի թանկ գնով են վաճառել իրենց ծառայության հաշվին: Սա նորմալ երևույթ է, այսինքն այն ժամանակ էլ էին իրենց ծառայությունը թանկ վաճառում, հիմա էլ են թանկ վաճառում, բայց սրանք սպառման լայն զանգված չունեն»,-հավելեց Գեղամ Գևորգյանը:

Աղբյուր` Փաստինֆո