Փաստ ինֆո

ԲԴԽ նախագահի պատկերացմամբ, եթե փաստաբանը դատական նիստից դուրս՝ դատախազի բացակայությամբ, նստում է դատախազի աթոռին, դա վիրավորական է դատախազի համար: Այս մասին հրավիրված ասուլիսին ասել է Երկրորդ նախագահ Ռոբերտ Քոչարյանի պաշտպանական խմբի անդամ Հայկ Ալումյանը՝ անդրադառնալով ԲԴԽ նախագահի դիմումին, որով վերջինս դիմել էր ՓՊ նախագահին՝ փաստաբանների նկատմամբ կարգապահական վարույթ հարուցելու համար:

«Դուք պատկերացնում եք՝ այս մարդը եղել է դատավոր,հիմա էլ՝ ԲԴԽ-ի նախագահ է, եղել է դատարանի նախագահ: Նա կարծում է, որ, եթե փաստաբանը դատախազի բացակայությամբ՝ դատական նիստից դուրս, գնաց նստեց դատախազի աթոռին, դա վիրավորական է դատախազի համար: Դուք պատկերացնու՞մ եք այդ մարդու մտածելակերպը: Դուք պատկերացնու՞մ եք այն դժբախտներին, ով դժբախտություն է ունեցել այս մարդու մոտ ամբաստանյալի կարգավիճակով դատվել: Դուք պատկերացնու՞մ եք այս մարդու պատկերացումն արդարադատության և կողմերի հավասարության մասին: Ես ուղղակի ցնցվեցի, որ նա այդպես է մտածում»,- ասաց Ալումյանը:

Ալումյանի խոսքով՝ հիմքեր չկան մտածելու, որ փաստաբան Միհրան Պողոսյանը դատավորի աթոռին նստել էր՝ որպես ակցիա:

«Այդ պահին դատական նիստ տեղի չէր ունենում: Դատական նիստերի դահլիճում միայն փաստաբաններով էինք և կարգադրիչներն էին»,- ասաց Ալումյանը՝ նշելով, որ կարգադրիչների, դատավորի օգնականների կամ քարտուղարների էջերում երկուսից մեկի մոտ կգտնվեն նկարներ՝ դատավորի աթոռին:

Ալումյանի խոսքով՝ եթե մի բան օրենքով արգելված չէ, իրավական ակտերով արգելված չէ, ինչպես կարող է ԲԴԽ նախագահի պաշտոնը զբաղեցնող անձն այդ գործողությունը համարել անհարգալից վերաբերմունք դատարանի հանդեպ և իրեն թույլ տալ այդպիսի թղթի տակ ստորագրել և դիմել ՓՊ-ին:

«Այս աստիճան  անկում՝ իրավական մտքի: ես ցավում եմ, որ հիմա մենք դրա ականատեսն ենք»,- նշեց Ալումյանը:

Հիշեցնենք, որ Ռոբերտ Քոչարյանի գործով մարտի 17-ին նշանակված դատական նիստը հետաձգվել էր գործով նախագահող դատավոր Աննա Դանիբեկյանի վատառողջ լինելու պատճառով: Այդ մասին կողմերին հայտնել էին հեռախոսազանգի միջոցով, սակայն Ռոբերտ Քոչարյանի և Յուրի Խաչատուրովի պաշտպանները դա գնահատելով որպես ոչ պատշաճ իրազեկում, գնացել էին դատարան` սպասելով, որ իրավասու անձը կներկայանա ու տեղեկացնի նիստի հետաձգման պատճառների մասին: Ու մինչ իրավասու անձը կգար` Յուրի Խաչատուրովի պաշտպան Միհրան Պողոսյանը փորձել է նստել դատավորի համար նախատեսված աթոռին, իսկ փաստաբան Հովհաաննես Խուդոյանն էլ՝ մեղադրող կողմի աթոռին։

 Փաստաբանները նիստերի դահլիճից հեռացել են, երբ դատարանի իրավասու աշխատակիցը նիստերի դահլիճում տեղեկացրեց նիստը հետաձգվելու մասին:

Ավելի ուշ հայտնի դարձավ, որ ԲԴԽ նախագահը դիմել է ՓՊ նախագահին՝ փաստաբաններ Հ.Ալումյանի, Հ.Խուդոյանի եւ Մ.Պողոսյանի նկատմամբ կարգապահական վարույթ հարուցելու համար։

Աղբյուր` Փաստինֆո