Փաստ ինֆո

Մշակվում են գործիքներ, որոնցով այս իրավիճակում աջակցություն կլինի թե՛ բիզնեսին, թե՛ հարկատուներին: Այս մասին լրագրողների հետ ճեպազրույցում ասաց ԱԺ «ԻՄ Քայլը» խմբակցության ղեկավար Լիլիթ Մակունցը: Նրա խոսքով՝ այս իրավիճակում բոլորն են տուժում և յուրաքանչյուրն իր չափով պետք է թեթևացնի պետության բեռը, ինչը, սակայն չի նշանակում, որ պետությունը չի կատարելու իր պարտավորությունները:
Մակունցը նշեց, որ պարտադիր պարապուրդի հետ կապված օրենք կա, բայց արտակարգ իրավիճակներում անհրաժեշտ է նոր օրենք, որի նախագիծը կլինի առաջիկայում:

Լրագրողների դիտարկմանը, որ գումարը պետք է փոխանցվի քաղաքացիներին, Մակունցն ասաց, որ Կառավարության գործողություններն արդարացված են և քաղաքացիներին այդ գումարները տալը կնշանակի սոցիալական բեռ թեթևացնել, որը կծախսվի և որևէ բան չի տա:

Անդրադառնալով այն հարցին, թե ինչու՞ ԱԺ պատգամավորները դիմակ չեն կրում, Մակունցն ասաց, որ հետևում է ԱՆ հորդորին և դիմակ չի կրում, քանի որ առողջ է:

Ըստ նրա ՝ ԱԺ-ն պարապուրդի մատնելը նպատակահարմար չէ:
«Նախ որովհետև՝ կյանքը ՀՀ-ում չի կարող կանգնել և այն գործառույթները, որոնք պետք է իրականացնենք, պետք է շարունակենք աշխատել»,- ասաց Մակունցը:

Նրա խոսքով՝ չեն կարող աշխատանքները դադարեցնել և ԱԺ նախագահը խորհրդի նիստին ասել է, որ այն մարդիկ, ովքեր գտնվում են խոցելի խմբում, իրենց բացակայությունը հարգելի կհամարվի:

«Այն աշխատակիցները, ովքեր ԱԺ-ում կունենան որոշակի խնդիրներ՝ գալու հետ կապված, այդ առումով, իհարկե, ընբռնումով է մոտենալու աշխատակազմը»,- ասաց Մակունցը:

Աղբյուր` Փաստինֆո