Փաստ ինֆո

Վարչապետի տիկին Աննա Հակոբյանը միացել է առողջապահության նախարարության կամավորական աշխատանքներին եւ քիչ առաջ լրագրողների ուղեկցությամբ կորոնավիրուսի կանխարգելմանն ուղղված քայլերի մասին իրազեկող բուկլետներ էր բաժանում քաղաքացիներին՝ մաղթելով նրանց առողջություն:

Մինչեւ ակցիայի մեկնարկը տիկին Հակոբյանը լրագրողների հետ ճեպազրույցում հայտարարեց, որ ինքնամեկուսացումից հետո մեկ անգամ է վարչապետի հետ խանութ գնացել եւ տուն եկել, ու միայն այսօր են մի պահ դուրս եկել փողոց եւ համոզվել, որ մարդիկ շատ ուշադիր են, գրկախառնության փորձեր չեն եղել:

«Մեր քաղաքացիները շատ լուրջ են վերաբերվում վարքագծի կանոններին , ես իմ օրինակով համոզվեցի, որ գիտակցական ամենաբարձր մակարդակն է, ինչը առաջին օգնությունն է լինելու կառավարությանը»,-նշել է Աննա Հակոբյանը՝ հավելելով, որ իր ընտանիքը կիրառում է այն բոլոր միջոցները, ինչի մասին հայտարարվում է: «Մենք գնացել էինք Սեւան, որտեղ այդ ամենը թեժացավ, ես , երեխաները տնից դուրս չենք գալիս, բոլոր ախտահանիչ միջոցները օգտագործում ենք, փորձում ենք կազմակերպել մեր առօրյան տանը, բավականին դժվար է, չեմ կարող հերքել»,-հավելել է վարչապետի տիկինը՝ մարդկանց կոչ անելով ըմբռնումով մոտենալ իրավիճակին:

Ուշագրավ է, սակայն, որ Աննա Հակոբյանը կորոնավիրուսի կանխարգելման իրազեկման ակցիային մասնակցում էր՝ կորոնավիրուսի կանխարգելման կանոններին չհետեւելով: Նա առանց դիմակի էր եւ ձեռնոցներ չէր կրում, ան դեպքում, երբ մասնագետներն այս օրերին բոլորին հորդորում են տնից դուրս գալիս հատկապես մեկանգամյա օգտագործման ձեռնոց կրել:

Այս հանգամանքը չվրիպեց քաղաքացիներից մեկի աչքից, որին տիկին Հակոբյանը բուկլետ փոխանցեց: Կինը, որ դիմակ էր կրում, հետաքրքրվեց, թե ինչու է վարչապետի տիկինն առանց դիմակի, ինչին ի պատասխան՝ Աննա Հակոբյանն ասաց.«Մենք դրա մասին կխոսենք»:

Աղբյուր` Փաստինֆո