Փաստ ինֆո

Նամակներ ենք ստանում, որ տարեց մարդկանց տարբեր մարմիններում աշխատանքի են կանչում: Այս մասին այսօր ԱԺ արտահերթ նիստի ժամանակ ասաց

«Լուսավոր Հայաստան» խմբակցության ղեկավար Էդմոն Մարուքյանը դիմելով Արդարադատության նախարար Ռուստամ Բադասյանին արդյոք պետությունն ունի իրավական ցուցումներ այս հարցով, թե ոչ:

«Պետությունն ինչ-որ ցուցում ունի, որ այս մարդը գործատուին ասի չեմ գալիս աշխատանքի, և իմ բացակայությունը պետք է հարգելի համարեք, որովհետև խոցելի խմբում եմ: Հետևաբար թողեք տանը մնամ, բայց աշխատավարձս էլ տվեք: Այստեղ իրավական ուղեցույցի բաց կա»,-նշեց Էդմոն Մարուքյանը:

Վերջինս նկատեց պետությունն արտակարգ դրություն է հայտարարել դրանով միջամտելով հազարավոր տնտեսվարողների, նրանց աշխատակիցների գործունեությանը, սակայն միջամտությունից հետո որևէ ցուցում չի արել, թե այդ մարդիկ իրենց կրած վնասներն ինչպես կարող են վերականգնել և արդյոք դա համարվում է ֆորսմաժոր:

«Ինչ դիրքորոշում ունի այս հարցում պետությունը: Պետք է ասի, որ օրինակ այս ժամկետից մինչև այս ժամկետը նշված մարդկանց գործունեությանը միջամտել ենք` արտակարգ դրություն հայտարարելով, հետևաբար ֆորսմաժոր է իրենց պարտականությունների չկատարման համար: Թե չէ մարդկանց ուղարկել դատարանների դուռը, որ գնացեք դատարան, դա մասնավոր հարց է իրար հետ վիճեք, արտակարգ դրության պայմաններում ճիշտ չէ»,-ընդգծեց Էդմոն Մարուքյանը:

Աղբյուր` Փաստինֆո