Փաստ ինֆո

«Դրանք մեռելածին նորմեր են, անգրագետ նորմեր եւ վկայում են այն մասին, որ իշխանության մեջ չկա որեւէ որոշում կայացնող գրագետ իրավաբան, որը ծանոթ է իրավակիրառ պրակտիկային»,-«Փաստինֆո»-ի հետ զրույցում ասաց փաստաբան Տիգրան Աթանեսյանը՝ անդրադառնալով ԱԺ-ի կողմից ընդունված «Հայաստանի Հանրապետության քրեական օրենսգրքում լրացում կատարելու մասին» եւ «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին» օրենքների նախագծերի փաթեթին, որով պատիժ է սահմանվում մեկուսացման կամ ինքնամեկուսացման կանոնները խախտելու համար։

Փաստաբանն ասաց՝ մի կողմ է թողնում «մեկուսացած» կամ «ինքնամեկուսացած» ձեւակերպումները, որոնք ըստ փաստաբանի, քրեական նորմի կիրառման համար տվյալ պարագայում էական չեն, առավել էականը, ըստ Աթանեսյանի այն է, թե ի՞նչ եղանակով պետք է հաստատեն, որ վարակը՝ կորոնավիրուսը, փոխանցվել է մեկ անձից, օրինակ տասը անձի: «Դա անհնար է, գիտությունը նման նվաճում չունի, հետեւաբար, եթե նման գործ լինի այն քննության ընթացքում միանգամից փակուղի կմտնի: Եթե անգամ վիրուսը մանրադիտակով տեսնեն, գրված չէ վարակողի անունը եւ անձնագրի սերիան եւ բացարձակ հասկանալի չէ, թե անձը վարակվեց այս ժամին , այս մարդուց, թե մեկ ժամ հետո, տանը՝ ուրիշից»,-ասաց Աթանեսյանը՝ շեշտելով, որ ապացուցումն անհնար է լինելու, հետեւաբար, խոսքը զուտ փիար նշանակության նորմի մասին է, որով քաղաքացիներին փորձում են վախեցնել, թե եթե չմեկուսանաք՝ կդատվեք:

Հիշեցնենք, որ ըստ փաթեթի, արտակարգ իրավիճակի հիմքով հայտարարված արտակարգ դրության ընթացքում մեկուսացման կամ ինքնամեկուսացման կանոնները խախտելն առաջացնում է տուգանքի նշանակում 100-250 հազար դրամի չափով : Մեկուսացման կամ ինքնամեկուսացման կանոններխախտելու հետեւանքով անզգուշությամբ այլ անձի վարակումը պատժվում է տուգանքով՝ 300-500 հազար դրամի չափով, կամ կալանքով՝ առավելագույնը 1 ամիս ժամկետով, երկու կամ ավելի անձանց վարակումը կամ մարդու առողջությանը ծանր վնասի պատճառումը պատժվում է տուգանքով՝ 500-700 հազար դրամի չափով, կամ կալանքով՝ 1-3 ամիս ժամկետով, կամ ազատազրկմամբ՝ մինչև 2 տարի ժամկետով, մարդու մահվան առաջացումը պատժվում է ազատազրկմամբ՝ 2-4 տարի ժամկետով։

«Այդ ամենը որեւէ աղերս չունի քրեական իրավունքի հետ, պետության եւ իրավունքի տեսության մեջ դրանք կոչվում են մեռելածին նորմեր, որը երբեք չի կարող կիրառվել, իսկ կիրառվելու դեպքում էլ այնպիսի խայտառակ ապօրինություն կլինի, որ անկախ կոնկրետ դեպքից, արդեն իսկ մարդու իրավունքները ոտնահարվում են»,-կարծում է փաստաբանը՝ հավելելով, որ քանի որ ապացուցման փաստն անհնարին է դառնում, խոսել մեղքի ձեւի կամ դիտավորության մասին, եւս անիմաստ է դառնում:

«Ի՞նչ է նշանակում անզգուշությամբ վարակել, ենթադրենք, մարդը հիվանդ է եւ պետք է հաց գնի, նրան ոչ ոք չի օգնում, նա գնում է խանութ՝ հնարավորինս պաշտպանվելով, բայց, ինչ-որ մեկի բախտը չի բերում, գալիս-հպվում է նրան եւ հիվանդանում, հիմա ստացվեց, որ անձն անզգուշությամբ վարակե՞ց, նա չէր կարող կանխել դա: Մեղքի անզգուշությունը կայանում է անփութության եւ ինքնավստահության մեջ, հիմա այս դեպքում հնարավոր չէ, անձը պետք է հաց առնի, որովհետեւ երեխաները սոված են, իսկ այդ՝ դիտավորությամբ վարակելը ես չեմ հասկանում, ի՞նչ է գնում ես, ինչ-որ մեկի վրա շնչո՞ւմ, դա ավելի շատ հոգեկան հիվանդի արարք է»,-նկատում է Տիգրան Աթանեսյանը:

Ինչ վերաբերում է Էջմածնի դեպքը որպես հնարավոր նախադեպ դիտարկելու հավանականությանը` փաստաբանը նկատեց, որ վարչապետ Փաշինյանը տվյալ դեպքը ներկայացրեց այլ կերպ, տիկինը՝ այլ: «Այստեղ կարծում եմ, ոչ թե անզգուշությամբ վարակելու, այլ պաշտոնեական անփություն կար, ես չեմ ուզում ասել ում կողմից, բայց կարելի է մտածել, որ շատ մարդկանց կողմից է եղել այդ անփությունը: Առհասարակ, չեմ հասկանում, թե ինչպես է երկրի ղեկավարը շարքային քաղաքացու վրա գցում այն, ինչ ինքը կամ իր ենթակաները չեն արել»,-եզրափակեց Աթանեսյանը:

Աղբյուր` Փաստինֆո