Փաստ ինֆո

Վարչապետի տիկին, «Հայկական Ժամանակ» օրաթերթի գլխավոր խմբագիր Աննա Հակոբյանը լրագրողների հետ ճեպազրույցում անդրադարձել է արտակարգ դրության պայմաններում ԶԼՄ-ների՝ կորոնավիրուսի վերաբերյալ տեղեկատվություն հաղորդելու սահմանափակումներին եւ այդ առնչությամբ մի խումբ խմբագիրների արտահայտած մտահոգությանը:

Աննա Հակոբյանը հարցադրումը համարել է «նախորդ կյանքից»

«Ես սխալված չեմ լինի, որ ասեմ՝ հիմա մեր կյանքը 360 աստիճանով շրջված է, մեր կյանքի բնականոն ընթացքը այլեւս գոյություն չունի եւ բոլոր այդ հարցադրումները կարծես նախորդ կյանքից լինեն, հիմա կառավարության բոլոր գործողությունները դեպի առաջ են նայում եւ նայում են մինիմալ տրավմաներով մեր ժողովուրդը դուրս գա այդ իրավիճակից։ Դրան են միտված նաեւ այդ սահմանափակումները օրենքները, որ ընդունվեցին, լրատվամիջոցների սահմանափակումները: Հարցադրումը նախորդ կյանքից է , մենք հիմա միջանկյալ վիճակում ենք եւ գնում ենք դեպի ապագան, այնպես, որ վտանգ չեմ տեսնում»,-հայտարարել է նա՝ հույս հայտնելով, որ բոլորը ըմբռնմամբ կմոտենան կառավարության գործողություններին:

Լրագրողների ճշտող հարցին, թե այսինքն, խմբագիրների անհանգստությունը տեղին չէ՞ր, Աննա Հակոբյանը արձագանքել է, թե արդեն պատասխանեց հարցին:

Նա տոկունություն է մաղթել կառավարությանը:

Հիշեցնենք, Հայաստանի ժուռնալիստների միությունն ու 23 լրատվամիջոցի ղեկավար պարզաբանումների համար դիմել են ՀՀ պարետ Տիգրան Ավինյանին՝ Արտակարգ դրության մասին որոշմամբ ԶԼՄ-ների համար նախատեսված սահմանափակումների վերաբերյալ պարզաբանումներ ներկայացնելու համար։

ՀՀ կառավարությունը մարտի 19-ին փոփոխություններ է կատարել 2020 թվականի մարտի 16-ին ընդունված «Հայաստանի Հանրապետությունում արտակարգ դրություն հայտարարելու մասին» որոշման մեջ՝ թույլատրելով լրատվամիջոցներին Հայաստանում, ինչպես նաև Հայաստանի տարածքներից դուրս նոր կորոնավիրուսի վերաբերյալ տեղեկություններ տարածելիս հղում կատարել նաեւ պետական պաշտոնատար անձանց կողմից կատարված հաղորդումների կամ նրանց հաղորդումներին կատարված հղումներին, օտարերկրյա պետությունների ղեկավարների, պետական մարմինների և (կամ) նրանց ներկայացուցիչների պաշտոնական կայքերին, սոցիալական ցանցերի պաշտոնական էջերին կատարված հղումներին , Հայաստանում հավատարմագրված և (կամ) Հայաստանի անդամակցությամբ միջազգային կազմակերպությունների պաշտոնական կայքերին, սոցիալական ցանցերի պաշտոնական էջերին:

Միեւնույն ժամանակ, շարունակում է բաց մնալ ԶԼՄ-ներին մտահոգող գլխավոր հարցը, թե ինչ պետք հասկանալ «ակնհայտ խուճապի հանգեցնող կամ խուճապային իրադրություն ստեղծելու իրական վտանգ պարունակող տեղեկություն» ձեւակերպման տակ:

Հավելենք , որ այսօր խորհրդարանում արդարադատության նախարար Ռուստամ Բադասյանը հայտարարել էր, որ կառավարությունն այս պահին քննարկում է խոսքի ազատության սահմանափակման դրվագով փոփոխություններ կատարելու նախաձեռնությունը։

Աղբյուր` Փաստինֆո