Փաստ ինֆո

ԱԺ «Բարգավաճ Հայաստան» խմբակցության պատգամավոր, մարդու իրավունքների մշտական հանձնաժողովի նախագահ Նաիրա Զոհրաբյանի գնահատմամբ՝ արտակարգ դրության ռեժիմը պահանջում է խաղի ընդհանուր կանոններ, պահանջում է, որ բոլորը ենթարկվեն մեկ ռեժիմի, բայց այն սահմանափակումները, որ դրված են մամուլի առաջ՝ անհասկանալի են։ 

«Լրատվականներից մեկը տպագրել էր լուր, որ Արմավիր ՔԿՀ-ում կալանավորները բողոքում էին, որ անգամ ծխախոտը թույլ չի տրվում փոխանցել իրենց, և սա դիտվել էր կանոնի խախտում ու լրատվամիջոցին պարտադրվել էր հոդվածը հեռացնել։ Այս կարգի բաներն իսկապես տրամաբանությունից դուրս են»,-Այս մասին այսօր «Փաստինֆո»-ի հետ զրույցում ասաց Զոհրաբյանը։

Նա ընդգծեց՝ ստեղծված իրավիճակում, երբ համաճարակ կա, շատ ավելի կարևոր խնդիրներ կան, ապա ավելացրեց՝ չի կարծում, որ ստեղծված իրավիճակում որևէ լրատվամիջոց այնքան անպատասխանատու կլինի, որ թույլ տա սադրանքներ ու մանիպուլյացիաներ տարածել։

Դիտարկմանը, թե այս պահին լրատվականների համար բողոքարկման մեխանիզմ նախատեսված չէ, այսինքն, եթե որոշում կայացվի, որ տվյալ հոդվածը ենթակա է հեռացման, ապա լրատվականն այս որոշումը չի կարող բողոքարկել, ԲՀԿ պատգամավորը պատասխանեց․ «Կարծում եմ, որ բողոքարկման հնարավորություն պետք է լինի բոլորի համար, այդ թվում լրատվականների»։

Զոհրաբյանը տեղեկացրեց, որ բազմաթիվ լրատվականներից ահազանգեր է ստացել, և եթե առաջիկայում այս խնդիրը չլուծվի, ապա պատրաստվում է ահազանգել գլխադասային հանձնաժողով և այս հարցը քննարկելու համար ԱԺ հրավիրել նաև խմբագիրների․ «Բոլորս պետք է մեկ խաղի կանոնի մեջ լինենք, բայց դա չի նշանակում, որ լրատվամիջոցների առջև պետք է դրվեն անտրամաբանական պահանջներ»։

Հիշեցնենք, որ Կառավարությունը արտակարգ դրություն սահմանելով սահմանափակել էր նաև ԶԼՄ-ների աշխատանքը ու նշել, որ «Լրատվական միջոցները վարակման առկա և նոր դեպքերի, անձանց առողջական վիճակի, վարակի աղբյուրների, առկա կամ հնարավոր վարակակիր անձանց հետ շփված այլ անձանց շրջանակի, զննում (վարակի թեստավորում) անցնող անձանց և մեկուսացվածների քանակի մասին կարող են հայտնել միայն պաշտոնական տեղեկատվության հիման վրա»։

Արտակարգ դրության մասին որոշման հրապարակումից հետո, լրատվամիջոցների դեմ ձեռնարկված քայլերը քննադատության էր արժանացել բազմաթիվ խմբագիրների, մեդիափորձագետների, իրավաբանների կողմից։

Հեղինակ՝ Սոնա Գեւորգյան

Աղբյուր` Փաստինֆո