Փաստ ինֆո

ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովը երկրորդ ընթերցման համար այսօր քննարկել է Կառավարության հեղինակած «Հասարակական կազմակերպությունների մասին» ՀՀ օրենքում փոփոխություններ կատարելու մասին» օրենքի նախագիծը: 

Հիմնական զեկուցող ՀՀ պետական եկամուտների կոմիտեի նախագահի տեղակալ Էդվարդ Հովհաննիսյանի ներկայացմամբ՝ առաջարկվող փոփոխությունները պայմանավորված են օրենքի կիրառման ընթացքում ի հայտ եկած տարընթերցումները բացառելու, առկա ձեւակերպումները հստակեցնելու, հանրային հաշվետվողականություն ապահովելու, ինչպես նաեւ ֆինանսական միջոցառումների աշխատանքային խմբի հանձնարարականների պահանջներին համապատասխանեցնելու հանգամանքով:

Քննարկման ընթացքում ԱԺ «Իմ քայլը» խմբակցության պատգամավոր Մարինա Կարապետյանն առաջարկել է, որ հկ-ի անդամների թիվը ներկայացվի հաշվետու տարվա դեկտեմբերի 31-ի դրությամբ․ «Ասինքն տարվա ընթացքում կարող են անդամներ գրանցվել կամ էլ հանել իրենց անդամակցությունը։ Կարևորը մեկ օր ֆիքսելն է, երբ այդ անդամների ընդհանուր թիվը ներկայացվի։ Իսկ կամավորների պարագայում ոչ թե նպատակահարմար ենք համարում, որ դեկտեմբերի 31-ի դրությամբ ցանկ լինի, հաշվետու տարվա ընթացքում ամբողջությամբ թիվը հաշվեն, անկախ նրանից միայն հուլիս ամսին է կամավոր եղել, թե դեկտեմբերի 31-ի դրությամբ էլ է կամավոր»։ ՊԵԿ նախագահի տեղակալն էլ ասաց, որ առաջարկն ընդունելի է իրենց համար։

Ըստ նախագծի՝ հաշվետվության հրապարակման պարտադիր պահանջ է սահմանվում բոլոր հասարակական կազմակերպությունների համար: Նախատեսվում է նաեւ սահմանել կամավորների թվի վերաբերյալ տեղեկատվության հրապարակման պահանջ, եթե կամավորի աշխատանքի տեւողությունը գերազանցում է շաբաթական 20 ժամը, եւ կազմակերպությունը կամավորների հետ կնքում է կամավոր աշխատանքի մասին պայմանագիր:

Նախագիծը դրական եզրակացություն ստացավ հանձնաժողովում և այն կընդգրկվի հերթական նիստերի օրակարգում։

Աղբյուր` Փաստինֆո