Փաստ ինֆո

ԱԺ «Իմ քայլը» խմբակցության պատգամավոր Սոֆյա Հովսեփյանը գնաճի վերաբերյալ քաղաքացիների արձանագրած բոլոր լուսանկարներն ու տվյալները հաղորդել է ՏՄՊՊՀ նախագահ Գեղամ Գևորգյանին:

«Փաստինֆո»-ի հետ զրույցում պատգամավորը նշեց, որ երեկվա դրությամբ՝ հանձնաժողովն ուսումնասիրել է մարզային խանութները: Հիմնական խանութներում թանկացումներ կա'մ չեն եղել, կա'մ էլ եղել են 10 դրամի տարբերությամբ, իսկ արդեն վերավաճառողների մոտ կրկնակի անգամ թանկացում է արձանագրվել. «Ալյուրը ամենաշատն էր թանկացել. Արթիկ քաղաքում մի տեղ այն թանկացել է 200 դրամով, մեկ այլ տեղ՝ 1500 դրամով: Գյումրիում նույնպես, այսինքն քաղաքների ներսում թանկացումներն անհատական են տեղի ունեցել: Եթե մարդը տեղյակ չեղավ, որ մեկ այլ տեղից ավելի մատչելի կարող է գնել ապրանքը, ապա սա անբարեխղճության հետևանք է»,-նկատեց Սոֆյա Հովսեփյանը:

Վերջինս հավելեց թանկացել է նաև դեղորայքը, մասնավորապես «Նատալի ֆարմ»-ում. «Երեկ եմ մտել այնտեղ կարիքավորներից մեկի համար դեղ գնելու: Դեղի տուփի վրա նշված էր 5750 դրամ, բայց երբ համակարգչով անցկացրեց, եղավ 6850 դրամ, այսինքն ուղիղ 1100 դրամ թանկացավ:Անգամ աշխատողը զարմացավ, որովհետև նա էլ տեղյակ չէր, ցանցով էր եկել: Այստեղից հետևություն, որ արհեստական գնաճ են գրանցել: Գործ ունենք անբարեխիղճ բիզնեսմենների հետ, որոնք, օգտվելով երկրում ստեղծված իրավիճակից, առավելագույն պահանջարկ ունեցող դեղորայքը, այդ թվում սեզոնային գրպի, մրսածության դեմ դեղերն անբարեխիղճ ձևով թանկացնում են»,-ասաց պատգամավորը նկատելով, որ նախքան թանկացումն էլ նրանք այդ դեղորայքից շահույթ ունեցել են, իսկ այժմ գերշահույթի են ձգտում: Ընդ որում Սոֆյա Հովսեփյանը նաև նշեց, որ «Նատալի ֆարմ» դեղատան կողքին գտնվում էր «Վագա ֆարմ» դեղատունը, որտեղ, սակայն, միևնույն դեղը չէր թանկացել:

Միևնույն ժամանակ պատգամավորը վստահեցրեց, որ ՏՄՊՊՀ-ն զբաղվում է այս բոլոր հարցերով և անընդհատ ուսումնասիրում: Ինչ վերաբերում է պատժիչ միջոցառումներին, ապա Սոֆյա Հովսեփյանն ասաց, որ այնտեղ, որտեղ գների արհեստական աճ է հայտնաբերվել, հանձնաժողովի կողմից զգուշացնող միջոցներ են ձեռնարկվել: Պատգամավորը նշեց, որ երեկ տեղեկություն է ստացել, որ երկու տեղ կանոնակարգվել է, բայց միևնույն է, դեռ շարունակվում են քաղաքացիների կողմից ահազանգերը:

Դիտարկմանը, որ քաղաքացիների գերակշիռ մասը հատկապես դժգոհում է «Երևան սիթի» սուպերմարկետների ցանցերում գների բարձրացումից, արդյոք Հանձնաժողովն այնտեղ մոնիտորինգ իրականացնում է, Սոֆյա Հոցսեփյանն արձագանքեց. «Կարծում եմ այո, որովհետև Երևան սիթիի տվյալներն էլ եմ ուղարկել, մասնավորապես բանջարեղենի գների հետ կապված: Ես անձամբ գնացի և տեղում համոզվեցի, որ մարդկանց նշած թվերը ճիշտ էին: Հանձնաժողովին տեղեկացրել եմ, ասացին կզբաղվեն: Դա նշանակում է, որ մոնիթորինգ են անում: Բայց մանրամասներին չեմ տիրապետում, ինձ համար էական է, որ վերջնարդյունքում քաղաքացին չտուժի»,-ընդգծեց պատգամավորը:

«Փաստինֆո»-ն նաև կապ հաստատեց ՏՄՊՊՀ-ի մամուլի խոսնակ Անի Սմբատյանի հետ տեղեկանալու, թե այս ընթացքում ինչ անբարեխիղճ թանկացումներ են արձանագրվել, սակայն Անի Սմբատյանն ասաց. «Այս պահին հստակ ժամկետ չեմ կարող նշել, բայց մոնիտորինգի արդյունքները կհրապարակվեն, այդպես կծանոթանաք»:

Նշենք, որ բազմաթիվ մարդիկ օպրեր շարունակ ահազանգում են գների բարձրացման հետ կապված, մասնավորապես նրանք նշում են, որ բարձրացել է ալյուրի, բանջարեղենի գները:

Հեղինակ՝ Հասմիկ Կոշկարյան

Աղբյուր` Փաստինֆո