Փաստ ինֆո

Ֆեյսբուքում յուրատեսակ ֆլեշմոբ է սկսվել, որով փաստաբաններն ու իրավապաշտպաններն իրենց անհամաձայնությունն են հայտնում Բարձրագույն դատական խորհրդի նախագահի գործողությունների նկատմամբ: Մասնավորապես, նրանք իրենց օգտահաշիվներում հրապարակում են լուսանկարներ, որտեղ Հայաստանի կամ այլ պետությունների տարբեր դատարանների դատավորների աթոռին են:

Այսկեպ իրավական հանրույթը անհամաձայնություն է հայտնում ԲԴԽ նախագահ Ռուբեն Վարդազարյանի դիմումին, որը նա երկու օր առաջ ուղղել էր է Փաստաբանների պալատի նախագահին, որպեսզի փաստաբաններ Հայկ Ալումյանի, Միհրան Պողոսյանի և Հովհաննես Խուդոյանի նկատմամբ կարգապահական վարույթ հարուցվի:
«Հելսինկյան կոմիտե»-ի նախագահ, իրավապաշտպան Ավետիք Իշխանյանը, հրապարակելով լուսանկարը, ի գիտություն ԲԴԽ-ի, կից գրառում է կատարել. «Ուղիղ 17 տարի առաջ՝ 2003թ․ ԱՄՆ-ի Կանզաս-Սիթի քաղաքի, Միսսուրիի նահանգային դատարանում, դատարանի նախագահի ներկայությամբ լուսանկարվեցի դատավորի աթոռին։ Զարմանալիորեն, պահվածքս ԱՄՆ դատական իշխանության կողմից չդիտարկվեց, որպես անհարգալից վերաբերմունք դատարանի նկատմամբ»։

Փաստաբան Երվանդ Վարոսյանն էլ հրապարակել է իր լուսանկարը՝ Լոս Անջելեսի քաղաքային դատարանի դատավորի աթոռին։ «Բա, ԲԴԽ ջան,  2010 թվականի ամռանը չարամտորեն նստեցի Լոս Անջելեսի քաղաքային դատարանի դատավորի աթոռին։ Էդ օրվանից հետախուզման մեջ եմ անհարգալից վերաբերմունքի հոդվածով, իսկ «ախպեր, դրոշը պահի նկարվեմ» խնդրանքս չմերժած մարշալը դեռ կրում է ազատազրկման ձևով պատիժը»,-հումորով գրել է փաստաբանը։

 «Հարգելի ԲԴԽ, սա էլ ես մի քանի տարի առաջ  վճռաբեկ դատարանի քրեական պալատի նախագահի աթոռին, դա քիչ է, մի հատ էլ պարոն Օհանյանի պատմուճանով (միայն այդ չափսը եղավ)»,այս գրառումն էլ մեկ այլ փաստաբան՝ Տիգրան Աթանեսյանի ֆեյսբուքյան էջում գտանք՝ կից լուսանկարի հետ միասին:

Հիշեցնենք, Բարձրագույն դատական խորհրդի նախագահը դիմել է Փաստաբանների պալատի նախագահին 2020թ․ մարտի 17-ին, ժամը 13:00-ին նշանակված և դատավորի վատառողջ լինելու պատճառով չկայացած Ռոբերտ Քոչարյանի և մյուսների  գործով դատական նիստի օրը դատարանի դահլիճում փաստաբանների կողմից դրսևորած վարքագծի առնչությամբ:

Երևան քաղաքի առաջին ատյանի ընդհանուր իրավասության դատարանի վարույթում քննվող թիվ ԵԴ/0253/01/19 քրեական գործով 2020թ․ մարտի 17-ին, ժամը 13:00-ին հրավիրվել է դատական նիստ: Դատական նիստը դատավոր Աննա Դանիբեկյանի վատառողջ լինելու պատճառով չի կայացել, որի մասին դատարանի աշխատակազմը նախապես դատավարության մասնակիցներին, այդ թվում` ամբաստանյալների պաշտպաններին տեղեկացրել է հեռախոսազանգի միջոցով: Այդուհանդերձ, թիվ ԵԴ/0253/01/19 քրեական գործով ամբաստանյալների պաշտպաններ Հայկ Ալումյանը, Արամ Վարդևանյանը, Միհրան Պողոսյանը և Հովհաննես Խուդոյանը 2020թ․ մարտի 17-ին, ժամը 13:00-ի սահմաններում ներկայացել են Երևան քաղաքի առաջին ատյանի ընդհանուր իրավասության դատարանի Շենգավիթի նստավայր և մուտք են գործել թիվ 1 դատական նիստերի դահլիճ:

Դատական նիստերի դահլիճում գտնվելու ընթացքում ամբաստանյալների պաշտպանների կողմից դրսևորվել է անհարգալից վերաբերմունք դատարանի և դատավարության մյուս մասնակիցների հանդեպ: Մասնավորապես` պաշտպան Միհրան Պողոսյանը նստել է նախագահող դատավորի համար նախատեսված սեղանի դիմաց և դատական կարգադրիչների պահանջներից հետո միայն դադարեցրել իր գործողությունները, պաշտպան Հովհաննես Խուդոյանը նստել է մեղադրանքի կողմի համար նախատեսված հատվածում (այն սեղանի շուրջ, որտեղ տվյալ գործով դատական նիստերին մասնակցում են մեղադրողները), Հայկ Ալումյանը, սեղանին հարվածելով, աղմուկ է բարձրացրել»,-ասվում է ՓՊ նախագահին ուղղված դիմումում:

ԲԴԽ նախագահը նշել է, որ «գտնվելով դատական նիստերի դահլիճում՝ վերջիններս ծաղրական վերաբերմունք են դրսևորել դատական իշխանության նկատմամբ, կազմակերպել «դատավարություն» և կատարել նմանաբնույթ անհարգալից գործողություններ»:

Աղբյուր` Փաստինֆո