Փաստ ինֆո

Արցախ այցելելու համար հատուկ պատճառի կարիք չունեմ:Այս մասին լրագրողների հետ զրույցում ասել է ՀՀ նախագահ Արմեն Սարգսյանը:

«Արցախ հաճախ եմ այցելում և այցելում եմ ինչ-որ իմաստով՝ որպես տուն: Սա իմ հերթական այցելություններից մեկն է: Խոսելու շատ բան ունենք նախագահ Բակո Սահակյանի հետ՝ և՛ ընդհանուր իրավիճակի մասին, և՛ այս օրերին ինչ է կատարվում սահմաններին, իհարկե հետաքրքրված եմ, թե ինչ է կատարվում Արցախի նախագահական և խորհրդարանական ընտրություններում»,- ասաց նախագահ Սարգսյանը՝ հավելելով, որ պատրաստվում է երկար ժամանակ անցկացնել և լսել նախագահ Սահակյանի գնահատականները: Նրա խոսքով՝ այցելությունն Արցախ որևէ կապ չունի Արցախի ընտրությունների հետ, չի հանդիպել և չի պատրաստվում հանդիպել նախագահի և խորհրդարանական թեկնածուների հետ:

Նախագահը նշեց, որ շատ էական է, որ այս ընտրությունները լինեն արդար, ազատ և անկախ՝ արտաքին և այլ գործոններից: «Արցախցիները հերոսական ժողովուրդ են, հաղթած ժողովուրդ են: Արցախը մեծ հաղթանակներ են տարել և արդար և ազատ ընտրությունները կլինեն ևս մեկ հաղթանակ՝ քաղաքական հաղթանակ»,- ասաց Ա.Սարգսյանը: Նրա խոսքով՝ Արցախում ազատ և արդար ընտրությունները կլինեն ևս մեկ հաղթանակ և այս անգամ՝ քաղաքական հաղթանակ՝ ցույց տալով բոլորին, որ Արցախի հանրապետությունն ամուր է, ունի հոյակապ կազմակերպված կառույցներ: «Այս պետությունը հզոր է ոչ միայն իր փոքր, բայց կարևոր տնտեսությամբ, իր բանակով, իր նվիրումով, այլև՝ ժողովրդավարական ժամանակակից պետություն է: Իրականում՝ Արցախի հիմնահարցի լուծմանը և այս ամբողջ գործընթացին կա միայն մեկ այլընտրանք՝ ամուր, հզոր Արցախի հանրապետություն և այս ընտրությունները կարող են էական, շատ կարևոր ներդրում լինել այս կարևոր գործին, որովհետև հաղթանակները տարվում են ոչ միայն ռազմի դաշտում, այլև՝ քաղաքական և միջազգային ատյաններում»,- ասաց նախագահը՝ նշելով, որ ԱՀ ապագա նախագահը և իր գործընկերները պետք է կրեն այդ բեռը։

Աղբյուր` Փաստինֆո