Փաստ ինֆո

Թանգարանները և գրադարանները միացել են վիրտուալ աշխարհին և ծրագրեր են ներկայացնում, որոնք տեղադրված են թե՛ իրենց ֆեյսբուքյան էջերում են և թե՛ կայքերում, սակայն շատ լավ է, որ ստեղծված է նաև մի ընդհանրական հարթակ, որի միջոցով բոլորը ներկայանում են մեկտեղ։ Այս մասին այսօր հրավիրված ասուլիսում ասաց ՀՀ կրթության, գիտության, մշակույթի և սպորտի նախարարի տեղակալ Նարինե Խաչատուրյանը։

Նա նշեց, որ այդ ծրագրերը կարելի է գտնել «տանը մնա», «թանգարանը կգա տուն», «տնից թանգարան», «միջթանգարանային համագործակցություն» և այլ հեշթեգերով։

«Թե՛ տարիքային և թե՛ սոցիալական տարբեր շերտերի համար ծրագրեր են մշակվում։ թե՛ վիրտուալ թանգարանները, թե՛ գրադարաններն իրենց շահառուների առումով ծրագրեր ունեն, որոնք դեռ չեն փորձարկվել, բայց անպատճառ կլինեն, օրինակ՝ սփյուռքահայերի համար մտածում ենք արևմտահայերենով ծրագրեր ստեղծել։ Հատուկ ծրագիր ենք մշակել, որն առաջին անգամ կփորձարկենք Դիլիջանում մեկուսացված մեր հայրենակիցների համար՝ Մոնթե Մելքոնյանի անվան վարժարանում, սա կլինի առցանց ծրագիրը, որը շատ ոգևորիչ կլինի, սակայն այս պահին կարծում եմ այդ մասին չենք խոսի»,-ասաց Խաչատուրյանը։

Նա առաջարկեց հակաճգնաժամային քայլերն անել թատրոնների, գրադարանների, համերգասրահների հետ․ «Սա շատ հետաքրքիր ու յուրօրինակ իրավիճակ է, որի մեջ հայտնվել ենք բոլորս՝ անկախ մեր կամքից»։

ԿԳՄՍ նախարարի տեղակալ Արայիկ Խզմալյանն էլ ավելացրեց, որ «Դասարան + դասական» նախագիծն ամբողջովին վերափոխվում է առցանց ձևաչափի, ուստի առցանց տեղի կունենան դասախոսություններ, ներկայացումների հատվածական դիտումներ ու քննարկումներ, զրույցներ անվանի դերասանների հետ, շրջայցեր թատրոնում։

«Կմեկնարկի նաև «Քո սերնդակիցը» նախագիծը, որի նպատակն է պատանիներին ծանոթացնել, ճանաչելի դարձնել իրենց սերնդակից երաժիշտ-կատարողներին։ Մենք մոտ 10-12 հոլովակներով ճանաչելի կդարձնենք տաղանդավոր երեխաներին ու օրինակներ կբերենք, թե աշխատասիրության, ջանասիրության շնորհիվ այդ տարիքում ինչպիսի միջազգային հաջողությունների կարելի է հասնել»,-ասաց Խզմալյանը։

Նա տեղեկացրեց, որ սիմֆոնիկ նվագախմբի հետ նոր ծրագրեր են քննարկվում` թվային տիրույթում մշակութային ժամանցի կազմակերպման հետ կապված։

««Ազգային կինոկենտրոնի» հետ համագործակցությամբ Հ1-ը հեռարձակում է «Չտեսնված կինո» նոր հաղորդաշարը, որը մի շատ կարևոր խնդիր է լուծում, մենք ունենք տասնյակ ֆիլմեր, ռեժիսորներ, որոնց աշխատանքը, ըստ էության, ծանոթ չէ հանրության լայն շրջանակներին և այս ձևչափն իսկապես մեծ ճանաչողական պոտենցիալ ունի»,-ասաց ԿԳՄՍ նախարարի տեղակալը։

Նրա խոսքով, համազգային թատրոնի աշխատակիցները նույնպես միացել են նախարարության աշխատանքներին ու շուտով առարկաների ընթերցանության ծրագիր կլինի, որի շրջանակում նաև քննարկումներ կլինեն։

«Մենք ունենք մի քանի կարևոր դիլմեր, որոնց պրեմիերաները շուտով կլինեն։ Անյալ տարի մեզ համար Կոմիտասի և Թումանյանի 150-ամյակի նշանավորման տարին էր և մենք պատրաստել ենք ֆիլմեր, որոնք նաև հաշվետու են կատարված աշխատանքների վերաբերյալ»,-ասաց Խզմալյանը։

Աղբյուր` Փաստինֆո