Փաստ ինֆո

Այսօր ԱԺ արտահերթ նիստի ժամանակ «Իմ քայլը» խմբակցության պատգամավոր Մխիթար Հայրապետյանն ուղերձով դիմել է կորոնավիրուսով վարակված քաղաքացիներին։

«Սիրելի քաղաքացիներ, ես չեմ ուզում պոպուլիստական կոչերով հանդես գալ, բայց ուզում եմ չանհանգստանաք, ավելի քան վստահ եմ, որ հաղթահարելու եք հիվանդությունը, և դրա համար կա պետություն, որն իր լավագույնն անում է»,-ասաց Հայրապետյանը։

Նա նշեց, որ գործադիր իշխանությունը 24 ժամ գիշեր ու ցերեկ աշխատում է, որպեսզի կորոնավիրուսով հիվանդները հաղթահարեն հիվանդությունը․ «Օրենսդիր իշխանությունը նույնպես լավագույնն անում է, որի վկայությունն է նաև այս ժամին, այս քննարկումն իրականացնելը, ես չեմ հիշում, որ նախկինում մենք այս չափ միասնական ձևով հարց քննարկեինք»։

Նրա խոսքով` կարանտինում գտնվող շուրջ 700 քաղաքացիների հոգեվիճակը հասկանալի է և նրանք ոչ պակաս ծանր վիճակում են․ «Ուզում եմ ասել, որ դուք ևս հաղթահարելու եք այս վիճակը»։

Դիմելով այն մարդկանց, ովքեր տանն են, Հայրապետյանն աասաց, որ սա լավ հնարավորություն է ընտանիքի անդամների, հարազատների հետ ժամանակ անցկացնելու համար։

«Այն իրավիճակը, որում մենք հայտնվել ենք, տոն չէ, ուրախություն չէ, բայց ես, կարծում եմ, կարելի է այնպես մոտենալ այս արտակարգ իրավիճակին, որ մենք իսկապես ուժեղացված դուրս գանք։ Բազմաթիվ քաղաքացիներ ասում են, որ վաղուց կարոտել են գիրք կարդալը, գուցե սա յուօրինակ հնարավորություն է ինքնազարգացման, ինքնակրթության համար։ Մարդիկ, որոնք ինքնամեկուսացված են, վերջապես ժամանակ կունենան իրենք իրենց հետ ազատ միայնակ մնալու ու իրենք իրենց հետ խոսելու, իրենց լսելու համար»,-ասաց «Իմ քայլը» պատգամավորը։

Նա ընդգծեց՝ շատ կարևոր է բոլորը գիտակցեն, որ պետք է մնալ տանը․ «21-րդ դարի մարտահրավերները, մեր ուսերին ծառացած բեռը կառավարում են մեզ, գուցե այս պահին, այս փուլում սա լավ հնարավորություն է, որ մի պահ մոռանանք այս պարտականոթյունների ու պարտավորությունների մասին, ժամանակ անցակցնենք ինքներս մեզ հետ, մեր սիրելիների ու հարազատների հետ, գիրք կարդանք, ֆիլմեր դիտենք և բոլորովին այլ կերպ մոտենանք այս խնդրին»։

Աղբյուր` Փաստինֆո