Փաստ ինֆո

Կենտրոնական բանկն ամենօրյա ռեժիմով իրականացնում է տնտեսության և ֆինանսական շուկաների մշտադիտարկում, քննարկում է տնտեսության հետագա զարգացման տարբեր այլընտրանքային սցենարներ և պատրաստ է արձագանքել ցանկացած իրավիճակին: Այս մասին այսօր լրագրողների հետ հանդիպման ժամանակ ասաց ԿԲ խորհրդի անդամ Արթուր Ստեփանյանը:

Դրամավարկային և ֆինանսական , մակրոտնտեսության քաղաքականության վերաբերյալ «Մարտի 17-ին նվազեցրեցինք վերաֆինանսավորման տոկոսադրույքը այն դեպքում, երբ մեր տարածաշրջանում շատ երկրներ թողեցին անփոփոխ կամ բարձրացրեցին: Պարզ է, որ ստեղծված իրավիճակում դրամավարկային քաղաքականության դերը սահմանափակ է, քանի որ դրամավարկային քաղաքականության գործիքակազմով հնարավոր չէ ազդել առողջապահական խնդիրներով պայմանավորված իրական տնտեսական զարգացումների վրա և ազդել տնտեսության առանձին հատվածների զարգացումների վրա: Սակայն կարևոր է շարունակել պահպանել մակրոտնտեսական կայունությունը, ինչը թույլ կտա կառավարությանն ավելի արդյունավետ ապահովել թիրախավորված միջոցառումները տնտեսության տարբեր հատվածների հետ կապված»,-ասաց Արթուր Ստեփանյանը:

Վերջինս նկատեց, քանի որ Հայաստանը 2015 թվականից բավականին ցածր գնաճային միջավայր ունի և ներկայումս գնաճը նույնպես ցածր է, այս քայլով հնարավորություն են տալիս նաև հավասարակշռել տնտեսական ակտիվությունը և գների կայունությունը:
ԿԲ խորհրդի անդամը վստահեցրեց` մոտակա ամիսներին գնաճը մնալու է ցածր մակարդակի վրա: Արթուր Ստեփանյանն ընդգծեց` գնաճի ավելացման որևէ ռիսկ չեն տեսնում:
«Կարևոր է նաև արձանագրել, որ մենք, հավատարիմ մնալով լողացող փոխարժեքի քաղաքականությանը, այսօր ունենք բավականին բարձր պահուստներ և բազմաշերտ գործիքակազմ, որպեսզի կարողանանք ապահովել նաև արտարժութային շուկան հնարավոր ցնցումներից, որը կարծում եմ այս պահին տեղի չի ունենա»,-հավելեց Արթուր Ստեփանյանը:

Աղբյուր` Փաստինֆո