Փաստ ինֆո

ԶՈՒ բժշկական ծառայությունն իրակականացնում է իր բնականոն աշխատանքները, ինչը նախատեսում է՝ հիվանդ զինծառայողների հայտնաբերումը: Այս մասին հրավիրված ասուլիսին ասել է ՀՀ ԶՈՒ ռազմաբժշկական վարչության պետ Սահակ Օհանյանը:

«Բոլոր կայազորներում առկա են զինվորական ռազմաբժշկական հաստատություններ, ում միջոցով բոլոր ներկայացված խնդիրներին լուծում են տալիս: Լինում են դեպքեր, երբ որևէ հետազոտության նպատակով՝ դժվարամատչելի, որոշում է կայացվում իմ կողմից նման զինծառայողներին տեղափոխել ՀՀ կենտրոնական զինվորական հոսպիտալ՝ անհրաժեշտ հետազոտությունների և անհրաժեշտ բժշկական օգնություն տրամադրելու համար»,- նշեց Օհանյանը:

Լրագրողի հարցին, թե արդյո՞ք կորոնավիրուսի կասկածանքով հոսպիտալացվել են զինծառայողներ, Օհանյանը պատասխանեց՝ ԶՈՒ-ն ունի երկու կարգի ծառայություն՝ ժամկետային և պայմանագրային: Նրա խոսքով՝ ժամկետային զինծառայողներին հնարավոր է պահել շատ խիստ պայմաններում, այսինքն՝ դադարեցնել արձակուրդները և վերահսկել դրսի հետ շփումները, բայց պայմանագրային զինառայողներն առավոտյան գալիս են ծառայության, իսկ երեկոյան մեկնում են տուն:

«Նրանց շփումները բնակչության հետ մաքսիմալ հորդորել ենք դադարեցնել, հորդորվել է չմասնակցել միջոցառումներին մարդաշատ, կարող են լինել նման դեպքեր, բայց այսօրվա դրությամբ մենք որևէ դեպք չունենք »,- ասաց Օհանյանը՝ նշելով, որ կա խիստ վերահսկողություն և ահազանգի դեպքում պատրաստ են կատարել իրենց առջև դրված խնդիրները:

Օհանյանը հայտնեց, որ պայմանագրային զինծառայողներն առավոտյան՝ հսկիչ անցագրային կետում ջերմաչափում են անում և ջերմության առկայության դեպքում բժշկական ծառայությունն իրականացնում է իր առջև դրված խնդիրները, այսինքն՝ միանգամից մեկուսացվում է:

Աղբյուր` Փաստինֆո