Փաստ ինֆո

Նախագիծն անընդունելի չէ, հեղինակը ցանկացել է, որ դատավորի պաշտոնում հավակնություն ներկայացնող անձը որոշակի փորձառություն ունենա։ Այս մասին ԱԺ պետաիրավական հարցերի հանձնաժողովի այսօրվա նիստի ժամանակ ասաց «Բարգավաճ Հայաստան» խմբակցության պատգամավոր Գևորգ Պետրոսյանը, անդրադառնալով ԱԺ «Իմ քայլը» խմբակցության պատգամավորների Աննա Կարապետյանի եւ Արթուր Դավթյանի հեղինակած՝ դատական օրենսգրքում փոփոխություններ կատարելու մասին նախագծին։

Նա նշեց՝ որպես դասախոս կարող է ասել, որ պրակտիկ աշխատանքը շատ ավելին է տալիս, քանի մագիստրոսի կրթությունը․ «Եթե մարդը բազային կրթությունը ճիշտ չի ստացել, իրեն մագիստրատուրայի դիպլոմն այնքան է պետք, որքան հիմա ինձ Չինաստանի ուղեգիրը»։

Պետրոսյանի խոսքով, եթե անձը բազային կրթությունը նորմալ ստացել է, ապա պետք է աշխատանքային փորձ։

«Ես իմ օրինակով եմ ասում՝ ավարտել եմ գերազանց առաջադիմությամբ, բայց չէի կարող դատավոր աշխատել, քանի որ փորձ էր պետք։ Բայց ես մնում եմ նաև այն կարծիքին, որ վտանգ կա՝ կարող է խնդիրը տարբեր իրավական կարգավորումների ենթարկվել տարբեր նորմատիվ ակտերով, եթե դեմ չեք պայմանավորվենք, որ մեկ միասնական կարգավորում լինի։ Մեր ժողովուրդը զզվել է մի հարցի համար 5 օրենք կարդալուց»,-ասաց ԲՀԿ խմբակցության պատգամավորը։

Պետրոսյանը շեշտեց, որ ինքը չի կարող դատավոր աշխատել՝ չնայած արդեն 24 տարի է դասավանդում է․ «Ես ինձ դատավորի թեկնածու չեմ համարում, որովհետև ես աշխատանքի փորձ չունեմ»։

Նա ընդգծեց՝ դատավորը մարդու ճակատագիր է որոշում և պետք է ունենա թե՛ տեսական գիտելիքներ և թե՛ պրակտիկ փորձառություն։

«Մենք պայքարու՞մ ենք ինչ-որ սկսնակ անգրագետներին կամ կիսագրագետներին ճանապարհ հարթելու համար, որոնք իրենց տվել են անհոգ կյանքի լիազորագիր և աշխատանքի չներկայանալով, բացարձակապես որևէ ներդրում չունենալով տվյալ հիմնարկի գործունեության մեջ ասում են մենք արժանի ենք, մենք դատավոր են։ Եկեք իսկապես այնպես անենք, որ մեր ժողովրդի եկամտային հարկերն ուղղենք նպատակային նշանակության»,-ասաց Պետրոսյանը։

Աղբյուր` Փաստինֆո