Փաստ ինֆո

Կառավարությունն այժմ նախագիծ է մշակում, որը կկարգավորի բոլոր այն դեպքերը, երբ աշխատանքը հեռավար կազմակերպելու հնարավորություն չկա և աշխատողը ֆիզիկապես աշխատանքի չի ներկայանում, գործ չի անում:

ԱԺ «Իմ քայլը» խմբակցության պատգամավոր, Առողջապահության և սոցիալական հարցերի հանձնաժողովի նախագահի տեղակալ Հերիքնազ Տիգրանյանը «Փաստինֆո»-ի հետ զրույցում նշեց` կառավարությունն այս ուղղությամբ օրենսդրական փոփոխություններ կբերի, որպեսզի այս ընթացքում ֆինանսական ցնցումներ չլինեն և մարդկանց մինիմալ եկամուտն ապահովվի. «Այս պահին Աշխատանքի և սոցիալական հարցերի նախարարությունն այժմ «Աշխատանքային օրենսգրքում» փոփոխություններ կատարելու վերաբերյալ նախագիծ է մշակում, որով կկարգավորվեն բոլոր այն դեպքերը, երբ գործատուն չի կարողանում աշխատանքը կազմակերպել հեռավար եղանակով: Այսինքն` հեռավար եղանակով աշխատելու դեպքում աշխատողը ստանում է ամբողջական աշխատավարձ, բայց եթե աշխատանքը չի կարողանում հեռավար կազմակերպել, ապա այս կարգավորումներով նախատեսվում է վարձատրության որոշակի չափ: Դա նշանակում է, որ եթե աշխատողն աշխատանքի չի ներկայանում, տանն է մնում և գործ չի անում, ապա ամեն դեպքում այս օրերի համար պետք է վարձատրվի օրենքով սահմանված չափով և կարգով»,-ասաց Հերիքնազ Տիգրանյանը:

Պատգամավորն ընդգծեց, որ եթե անգամ նախագիծն ընդունվի մեկ շաբաթ հետո, միևնույն է, տարածվելու է մարտի 16-ից հետո, այսինքն արտակարգ դրություն հայտարարելուց հետո գործատուի և աշխատողի միջև ծագած հարաբերությունների վրա. «Ուզում եմ ցրել մարդկանց այդ մտավախությունը, որ եթե գործատուն իրենց տուն ուղարկեց, ուրեմն կզրկվեն աշխատավարձից կամ օրավարձից: Կառավարությունը մշակում է նրանց համար ֆինանսական ցնցումները մեղմելու նախագիծ, որը մի քանի օրից կշրջանառվի»,-հավելեց Հերիքնազ Տիգրանյանը:

Վերջինս նկատեց` չի կարելի այս իրավիճակը ձևակերպել ո'չ որպես հարկադիր պարապուրդ, ո'չ էլ ֆորսմաժորային, քանի որ դրանք իրավական տարբեր ռեժիմներ են և ունեն տարբեր կարգավորումներ: Պատգամավորը մանրամասնեց, որ հարկադիր պարապուրդը պետք է լինի կա'մ գործատուի, կա'մ էլ աշխատողի մեղքով, սակայն այս իրավիճակում նրանց երկուսի մեղքն էլ բացակայում է:
«Իհարկե լավ կլիներ, որ գործատուն որոշեր ձևակերպել որպես հարկադիր պարապուրդ, քանի որ աշխատողը գոնե կստանար աշխատավարձի երկու երրորդը:

Սակայն տեղյակ եմ, որ շատ գործատուներ ավելի վատ կարգավորումներ են նախատեսել: Աշխատողներին ուղարկել են իբրև թե իրենց դիմումի համաձայն չվճարվող արձակուրդի, որպեսզի արտակարգ դրությունից հետո, երբ իրավիճակը շտկվի, կրկին աշխատանքի վերադառնան: Քանի որ չկա օրենսդրական կարգավորում և արտակարգ դրություն մտցնելու մասին կառավարության որոշման մեջ էլ հստակ չէ, թե ինչպես պետք է մասնավոր հատվածում վարվեն գործատուն և աշխատողը, ապա յուրաքանչյուր գործատու, ըստ էության, ինքն է որոշում` ինչ վարքագիծ դրսևորի»,-նշեց Հերիքնազ Տիգրանյանը` ևս մեկ անգամ ընդգծելով, որ կառավարությունն այժմ աշխատում է այս ուղղությամբ:

Հեղինակ՝ Հասմիկ Կոշկարյան

Աղբյուր` Փաստինֆո