Փաստ ինֆո

«Հայաստանի Հանրապետության քրեական օրենսգրքում լրացում կատարելու մասին» եւ «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին» օրենքների նախագծերի փաթեթն առաջին և երկրորդ ընթերցմամբ այսօր ընդունելու նպատակով ԱԺ «Իմ քայլը» խմբակցության պատգամավոր Սուրեն Գրիգորյանն առաջարկեց` նախագծի վերաբերյալ առաջարկները ներկայացնել սեղմ ժամկետում:

«Եթե բոլոր պատգամավորները համաձայն են` կարող են սեղմ ժամկետում առաջարկ ներկայացնել կամ հայտարարել, որ առաջարկ չունեն։ Ինքնանպատակ չէ` նստել 3 ժամ սպասելը», - ասաց պատգամավորը։

ԱԺ նախագահ Արարատ Միրզոյանը հայտարարեց, որ այդ տարբերակի մասին ինքը եւս մտածել է, սակայն, եթե անգամ բոլոր պատգամավորները միաձայն ասեն, որ առաջարկ չունեն, ապա չի բացառվում, որ 2 ժամ 40 րոպե հետո որևէ մեկի մտքով նոր առաջարկ անցնի․ «Սա իրավունք է, սահմանված իրավունք է և մենք չենք կարող այն կրճատել»։

ԱԺ «Լուսավոր Հայաստան» խմբակցության ղեկավար Էդմոն Մարուքյանն էլ ասաց, որ երկրում արտակարգ դրություն է և իրենց խմբակցությունը պատրաստ է գիշերն էլ մնալ ու քննարկել. ««Իմ քայլը» եւս պատրաստ է, բոլորը պատրաստ են, եկեք անենք, անցնենք առաջ, եկել ենք արդեն»։

ԱԺ «Բարգավաճ Հայաստան» խմբակցության պատգամավոր Արման Աբովյանը նույնպես առաջարկը տրամաբանական համարեց, սակայն հիշեցրեց, որ ԱԺ-ում ընդունված որոշումներն իրավական առումով չպետք է խոցելի լինեն։

«Եթե մի փոքր խոցելի տեղ թողեցինք, ես ձեզ հավատացնում եմ , որ ո՛չ երկուշաբթի, ո՛չ երեքշաբթի, ո՛չ չորեքշաբթի օրենքը պարզապես չի անցնի։ Այստեղ խոցելիության խնդիր է։ Ես իրավաբան չեմ, սակայն գիտեմ մի բան, եթե օրենքում գրված է «ա», ուրեմն դա «ա» է»,-ասաց Աբովյանը։

Պետաիրավական հարցերի մշտական հանձնաժողովի նախագահ Վլադամիր Վարդանյանը եւս նկատեց, որ օրենսդրական փոփոխությունների իրականացումը պետք է անխոցելի լինի: «Իրոք, մենք գործ չունենք սովորական օրենսդրության հետ, այլ գործ ունենք վարչական և քրեական պատասխանատվություն նախատեսող, մարդու իրավունքները սահմանափակող օրենսդրական ակտերի հետ, որոնք կարող են հանգեցնել տարբեր տեսակի բողոքների, վիճարկումների, այդ թվում նաև` ըստ ձևի ընդունման, սահմանադրականության հարց կարղ է բարձրացվել։ Հասկանում եմ` բոլորիդ պատրաստակամությունն ու նաև ողջունում եմ այս միահամուռությունը, բայց, այդուհանդերձ, ԱԺ կանոնակարգ օրենքը սահմանադրական օրենք է, դրանում նախատեսված սահմանափակումները, ըստ էության, Սահմանդրությունից բխող ուղղակիորեն սահմանափակումներ են։ Ես առաջարկում եմ մնանք սահմանադրական օրենքի կանոնակարգման տիրույթում, հակառակ դեպքում վաղը, մյուս օրը հնարավոր են իրավիճակներ, երբ ըստ ընդունման ձևի այս օրենսդրական ակտերը կվիճարկվեն դատական ատյաններում»։

Ի վերջո ԱԺ-ն 94 կողմ, 0 դեմ ձայներով որոշեց հարցի առաջին ընթերցամբ հարցը քննարկել այսօր, իսկ երկրորդ ընթերցմամբ՝ երկուշաբթի օրը։

Աղբյուր` Փաստինֆո