Փաստ ինֆո

Աշխարհում նոր տիպի կորոնավիրուսը բացասաբար ազդեց զբոսաշրջության ոլորտի վրա: Ստեղծված իրավիճակով պայմանավորված բազմաթիվ ավիաընկերություններ ամբողջությամբ կամ մասնակի չեղարկեցին տարբեր ուղղություններով իրենց չվերթները: Մարտի 20-ի դրությամբ «Զվարթնոց» օդանավակայանում չեղարկվել է 6 չվերթ, որոնցից հինգը Մոսկվա-Երևան-Մոսկվա ուղղությամբ, իսկ մեկը Կիև-Երևան-Կիև: Այսօր չեղարկվել է նաև դեպի Միներալնիե Վոդի չվերթը: Ինչ վերաբերվում է այսօր իրականացված կամ սպասվող չվերթներին, ապա դրանք մոտ 17-ն են, որոնցից 10-ը Մոսկվա, երկուսը Թբիլիսի և մեկական չվերթներ Եկատերինբուրգ-Երևան-Եկատերինբուրգ, Շարժա-Երևան-Շարժա, Կրասնոդար-Երևան-Կրասնոդար, Սոչի-Երևան-Սոչի, Վիեննա-Երևան-Վիեննա և Երևան-Վորոնեժ:

«Փաստինֆո»-ի հետ զրույցում «Զվարթնոց» օդանավակայանի հասարակայնության հետ կապերի բաժնի պատասխանատու Սաթենիկ Հովհաննիսյանը հաստատեց չվերթների չեղարկման պատճառը կորոնավիրուսն է. «Ռուսաստանը սահմանափակել է օդային սահմանը, դրա հետ կապված ռուսական մի քանի ավիաընկերություններ, այդ թվում Aeroflot-ը, Red Wings-ը, Utair-ը կրճատել են իրենց չվերթները: Այսինքն չվերթների որոշ մասը չեղարկում են, մյուս մասն էլ սպասարկում են»,-ասաց Սաթենիկ Հովհաննիսյանը:

Վերջինս նկատեց` չվերթների կրճատումը, բնականաբար, կհանգեցնի նաև ուղևորահոսքի նվազեցման, սակայն այս պահի դրությամբ դեռևս հստակ տվյալներ չի կարող նշել:

Հեղինակ՝ Հասմիկ Կոշկարյան

Աղբյուր` Փաստինֆո