Փաստ ինֆո

Իտալիայից վերջին հատուկ չվերթով ժամանած քաղաքացիներից գրեթե բոլորն իրենց լավ են զգում, միայն երեկ ջերմության բարձրացում է եղել մի պացիենտի մոտ, ում տեղափոխել ենք հիվանդանոց ու կթեստավորենք։ Այս մասին այսօր հրավիրված ասուլիսում ասաց ՀՀ առողջապահության նախարար Արսեն Թորոսյանը։

Նա հայտնեց, որ մյուսներին թեստավորելու են կարանտինային ժամկետը լրանալուց հետո, որովհետև նրանք փաստացի առողջ մարդիկ են․ «Նույնիսկ եթե նրանց մոտ վիրուսն առկա է, 14-րդ օրն այն պարզապես դուրս գալով օրգանիզմից՝ «բուժվելով», մեզ հնարավորություն կտա ստանալ բացասական պատասխան։ Մենք դրանում համոզվեցինք, երբ մյուս օջախի հետ կապված անձանց թեստավորեցինք՝ առանց որևէ նախանշանների և հայտնաբերեցինք մոտ 18 դեպք, երբ որևէ ախտանշան չկար։ Մեր կորոնավիրուսով հիվանդների թվերին +18 արեցինք, սակայն եթե չանեինք խնդիր չէր էլ լինի։ Այսինքն 122 դեպքի փոխարեն հանգիստ կարելի էր ասել 104 դեպք»։

Խոսելով կրկնակի վարակման հավանականության մասին՝ Թորոսյանն ասաց, որ այն չի կարող ոչ ոք բացառել, հատկապես երբ վիրուսը դեռ ուսումնասիրվում է։
«Միգուցե դրա մասին 2-3 տարի հետո հնարավոր լինի խոսել, բայց եթե նույնիսկ այդպես է, մենք պետք է վիրուսի հետ սովորենք ապրել կողք-կողքի, ինչպես ապրում ենք շատ վիրուսների հետ․․․պաշտպանման միջոցները, անկախ նրանից մարդը վարակվել է, թե ոչ՝ մնում են ուժի մեջ։ Կարող ենք ենթադրել, որ ձևավորվում է իմունիտետ, որովհետև եթե այն չձևավորվեր մարդը վիրուսից չէր ազատվի, իմունիտետն է վիրուսին մաքրում օրգանիզմից՝ հակամարմիններով, բայց արդյոք այդ իմունիտետը տևում է 1 շաբաթ, 1 ամիս, 1 տարի, թե ցմահ, դեռ չենք կարող ասել»,-ասաց Թորոսյանը։

Թորոսյանի խոսքով, գալու է մի պահ, երբ մարդիկ այլևս կորոնավիրուսով վարակվածների թվերի հետևից չեն ընկնելու։

«Եթե մենք թեստավորում ենք 14-րդ օրը ու ստանում ենք բացասական պատասխան, գրեթե 100 տոկոսով կարող ենք վստահ լինել, որ վիրուսը մեր օրգանիզմում չկա։ Դրա համար նաեւ կրկնակի թեստավորում է արվում պացիենտներին, որոնց մոտ հաստատված եղել վիրուսը՝ 24 ժամ ինտերվալով։ Այսինքն՝ արվեց, բացասական պատասխան ստացանք, սպասում ենք 24 ժամ, մի հատ էլ արեցինք, մի հատ էլ ստացանք բացասական պատասխան, ասում ենք՝ դուք չունեք էլ վիրուս, բայց չենք ասում՝ վաղը չես կարող վարակվել։ Բայց հավանականությունը, որ ինքն այլոց կվարակի, մոտ է զրոյի»,-ասաց նախարարը։

Աղբյուր` Փաստինֆո