Փաստ ինֆո

Կորոնավիրուսով վարակվածների շրջանակում 38 աստիճան ջերմությունից բարձր ունեն ընդամենը հինգ հոգի, 39-ից բարձր չունենք: Կառավարության նիստի ժամանակ այս մասին ասաց ՀՀ առողջապահության նախարար Արսեն Թորոսյանը` ներկայացնելով վարակակիրների վիճակը:

«60 տարեկանից բարձր անձինք 13-ն են, որոնցից ոչ մեկի ջերմությունն այս բարձր ջերմությունների մեջ չի մտնում: Որևէ մեկի կյանքին վտանգ չի սպառնում: Երբ հաստատված դեպք ենք ունենում, պահում ենք բժիշկների հսկողության տակ, իսկ նրանց կոնտակտավորների շրջանակը մեկուսացնում ենք հատուկ վայրերում: Որոշ դեպքերում իրականացնում ենք նաև ինքնամեկուսացում»,-ասաց Արսեն Թորոսյանը:

ՀՀ վարչապետ Նիկոլ Փաշինյանը հետաքրքրվեց, թե աշխարհում ինչ է կատարվում: Նախարարը նկատեց` այն օջախները, որտեղ սկսվել են բռնկումները, կարողացել են մարել. «Խոսքը Չինաստանի մասին է: Նույնիսկ երեկ որևէ դեպք չի արձանագրվել Չինաստանում, սակայն բռնկումներն ինտենսիվ շարունակվում են հատկապես Եվրոպայում: Արդեն 10 հազարին են հասնում Ֆրանսիան, Գերմանիան, Իտալիան արդեն 30 հազարից ավել ունի: Մահերի թիվը մոտենում է 3000-ի: Մահացողների մեծ մասը բարձր տարիքի մարդիկ են` 70-80 և ավելի: Համաշխարհային առողջապահության ամբողջ քաղաքականությունն այդ ուղղությամբ է գնում, որ եթե նույնիսկ էպիդեմիան տարածվի ամբողջ աշխարհում և նույնիսկ հետ գնա Չինաստան, հիմնական խնդիրը դրվում է տարեցների և ի սկզբանե խրոնիկ հիվանդություններ ունեցող անձանց պաշտպանության վրա և նրանց պատշաճ բուժօգնության մատուցման վրա»,-հավելեց Արսեն Թորոսյանը` ընդգծելով, որ այս ուղղությամբ սկսել են արդեն քայլեր ձեռնարկել:

Հիշեցնենք, որ այս պահի դրությամբ Հայաստանում կա կորոնավիրուսի 115 հաստատված դեպք, որից մեկն արձանագրվել է ինֆեկցիոն հիվանդանոցի բուժքրոջ մոտ:

Աղբյուր` Փաստինֆո