Փաստ ինֆո

Կասկածից վեր է, որ կորոնավիրուսն ունենալու է ավելի ընդգրկուն բնույթ և այն երկրները, որտեղ մեծ թվով հայեր են բնակվում, զերծ չեն մնա այս համաճարակի հետևանքներից: Այս մասին հրավիրված ասուլիսին ասել է Սփյուռքի գործերի գլխավոր հանձնակատար Զարեհ Սինանյանը:

Նա նշեց, որ Իրանի հայկական համայնքը ևս ապրում է արտակարգ իրավիճակում և մինչև այս պահն ունենք 1 մահ, որը կապված է կորոնավիրուսի հետ: Սինանյանի խոսքով՝ Հոլանդիայում իրավիճակը բավարար է, Իտալիայում վարակվածների մասին որևէ տեղեկատվություն չկա:

«Նույն իրավիճակն է նաև Եվրոպայի մյուս երկրներում: Կոնկրետ տեղեկություն չունենք հայ վարակվածների մասին, սակայն մշտական կապը շարունակում ենք իրենց հետ և նորություն իմանալու դեպքում կիրազեկենք»,- նշեց Սինանյանը:

Նրա խոսքով՝ տարբեր երկրներից հայրենակիցները դիմում են գրասենյակ, հիմնականում կապված՝ Հայաստան տեղափոխվելու կամ մուտք գործելու հետ: Ըստ նրա՝ր շատ են դիմորդները ՌԴ-ից, որտեղից հայրենակիցները ցանկանում են ցամաքային ճանապարհով մուտք գործել Հայաստան:

«Բացատրում ենք, որ դա այս պահին անհնար է, քանի որ նրանք պետք է Վրաստանի տարածքով անցնեն, իսկ որպես ՀՀ քաղաքացի կամ ՌԴ քաղաքացի, դա անել չեն կարող, հետևաբար՝ պետք է գան օդային միջոցով»,- նշեց Սինանյանը:

Վերջինս նշեց, որ անձինք, ովքեր գույք են տեղափոխել Հայաստան և անհանգստացած են,ապա նրանց պատասխանում են, որ պարզ չէ, թե ինչ զարգացում կունենա համաճարակը և հայտնի չէ, թե ինչ քայլերի կդիմեն:

Սինանյանի խոսքով՝ վերջին երկու շաբաթների ընթացքում կազմակերպվել է մոտ մեկ տոննա ՝ կանխարգելիչ, ախտահանիչ բժշկական պարագաների ներմուծումը Հայաստան, որն արդեն իսկ շաբաթվա վերջին Հայաստանում էր: Նրա խոսքով՝ այս գործընթացը շարունակական է:

Սինանյանը հայտնեց, որ գործուղումները կասեցվել են, մասնավորապես՝ չեղարկվել է այցը ՌԴ, Իրան, ԱՄՆ, Ֆրանսիա, ինչպես նաև՝ Զատկի տոնին նախատեսված էր մեկնել Հալեպ, ինչը ևս կասեցվել է: Այս պահին դադարեցվել է նաև Համահայկական համաշխարհային վեհաժողովի հրավերներն ուղարկելու գործընթացը:

Աղբյուր` Փաստինֆո