Փաստ ինֆո

«5-րդ ալիք» ՀԸ սեփականատեր Արմեն Թավադյանի և Վարուժան Մկրտչյանի քրեական գործը մակագրվել է Երևանի ընդհանուր իրավասության դատարանի նախագահ Արթուր Մկրտչյանին: Դատական տեղեկատվական համակարգից տեղեկանում ենք, որ գործը դատարան մուտք է եղել մարտի 18-ին և նույն օրը մակագրվել է:

Հիշեցնենք, որ Արմեն Թավադյանը մեղադրվում է «Մարտի 1»-ի գործով տուժողներից մեկին կաշառելու համար, դատարանում սուտ ցուցմունք տա։ Նրա դեմ ցուցմունք է տվել Ռ.Քոչարյանի մեկ այլ ենթադրյալ աջակից՝ Վ.Մկրտչյանը, որը նախ ձերբակալվել էր, ապա ազատ արձակվել։

Ա.Թավադյանը չի ընդունում առաջադրված մեղադրանքը, իսկ ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը, հայտարարել է, որ տուժողներին կաշառելու անհրաժեշտություն չկա եւ չի եղել, քանի որ քրեական գործում չկա Ռ.Քոչարյանի դեմ որեւէ ցուցմունք, որը փոխելու կարիք լինի։

Արմեն Թադայանն ավելի քան երկու ամիս գտնվել է նախնական կալանքի տակ եւ միայն վերաքննիչ քրեական դատարանը՝ Ալեքսանդր Ազարյանի նախագահությամբ, օրերս վերացրեց նրա նկատմամբ որպես խափանման միջոց ընտրված կալանավորումը՝ արձանագրելով, որ բացակայում է հիմնավոր կասկածը։

«Փաստինֆո»-ի հաղորդմամբ՝ դատավոր Արթուր Մկրտչյանը, ում մակագրվել է քրեական գործը,  նախկինում երկար տարիներ աշխատել է դատախազությունում, եղել է Լոռու մարզի դատախազը։

Հեղինակ՝ Իզաբել Սահակյան

Աղբյուր` Փաստինֆո