Փաստ ինֆո

Էկոնոմիկայի նախարար Տիգրան Խաչատրյանն ասյօր լրագրողների հետ հանդիպմանը հայտարարել է, որ կառավարությունը նպատակ ունի զգալի ֆինանսական աջակցություն ցուցաբերել այն տնտեսվարողներին, ովքեր ունեն դժվարին պայմաններ՝ ստեղծված իրավիճակի պատճառով, բայց նաեւ ունեն ծրագիր եւ պատկերացումներ, թե ինչպես է հնարավոր հաղթահարել այդ դժվարությունները եւ երկրորդ, ըստ նախարարի, կառավարության գործողություններն ուղղված կլինեն այն մարդկանց, ովքեր երեկ ունեին աշխատանք, բայց այսօր կարող է ունենան դժվարություններ աշխատանքը ժամանակավորապես կորցնելու պատճառով:

Կառավարությունը, ըստ Տիգրան Խաչատրյանի,  արդեն քիչ թե շատ կայուն միջավայրում  հատուկ դրամագլուխ կհատկացնի այն կազմակերպություններին, որոնք կկարողանան  ձեւակերպել իրենց զարգացման ծրագրերը եւ կդիմեն կառավարությանը՝ դրանք քննարկելու եւ աջակցություն ստանալու համար:

Անդրադառնալով  ոլորտներին, որոնք նոր տնտեսական իրողությունների պայմաններում առաջին հարվածն ստացան, էկոնոմիկայի նախարարը առանձնացրեց զբոսաշրջության ոլորտը, որպես արտահանման հիմնական շուկա՝ ռուսական շուկայում գործունեություն ծավալող արտահանող ընկերություններին եւ հանքահումքային ոլորտը:

«Նախորդ տարվա ընթացքում 550 մլն դոլարը գերազանցող պղնձի խտանյութի արտահանում է տեղի ունեցել նախորդ տարվա գների պայմաններում»,-ասաց նախարարը՝ հավելելով, որ դժվար է ասել, թե ոլորտում գործող որ կազմակերպությունը ինչպես կարձագանքի միջազգային շուկայում պղնձի գնանկամանը:

Անդրադառնալով դեղերի եւ առաջին անհրաժեշտության բժշկական պարագաների ներմուծման դեպքում մաքսատուրքի զրոյացման արտոնությունների հարցին, Տիգրան Խաչատրյանը ասաց, որ  նախաձեռնությունը տեղի է ունեցել ՀՀ կառավարության կողմից: «Գրեթե բոլոր ապրանքներն ու պարագաներն են , որոնք ներկրվում են երրորդ երկրներից,  եւ որոշում է կայացվել, որ դրանք առաջիկայում պետք է ներկրվեն առանց մաքսատուրքերի»,-տեղեկացրեց նա:

Աղբյուր` Փաստինֆո