Փաստ ինֆո

«Ես մնում եմ միայն զարմացած, որ կառավարության կազմը ծափահարեց այն գործարարներին, որոնք Հայաստան կարտոֆիլ են ներկրում, փոխանակ ծափահարի այն մարդկանց, որոնք կարտոֆիլ են արտադրում »,-«Փաստինֆո»-ի հետ զրույցում մտահոգություն հայտնեց Ագրարագյուղացիական միավորում ՀԿ նախագահ Հրաչ Բերբերյանը՝ անդրադառնալով կառավարության այսօրվա նիստին ու Հայաստանի պարենային անվտանգության խնդրին:

Մասնագետը տարակուսած է՝ գարնան գյուղատնտեսական աշխատանքների սկիզբն է, բայց գործադիրից եւ ոչ մեկը որեւէ բառ այդ մասին:

«Ամեն ինչով ուզում են զբաղվել, բացի գյուղատնտեսությունից եւ ծափահարում է այն մարդուն, ով հարուստ է եւ Բելառուսից կարտոֆիլ է ներկրում եւ դա այն Հայաստանում, որ 4-5 տարի առաջ կարտոֆիլ էր արտահանում: Ես մնում եմ զարմացած մեր կառավարության անդամների վրա, փոխանակ Հայաստանի արտադրությունը խթանեն, առաջ տանեն ծափահարում են ներկրողին: Դե մակարդակն այդ է…»,-կարծում է Բերբերյանը:

Հիշեցնենք, որ կառավարության այսօրվա նիստին վարչապետ Փաշինյանը հայտարարեց, որ Հայաստանն ունի սննդի բավականին լավ պաշար «Օրինակ՝ շաքարավազի 201 օրվա պաշար ունենք, հավի մսի՝ 64 օրվա, ձեթի՝ 38 օրվա»,-հայտարարել էր վարչապետը: Փաշինյանը տեղեկացրել էր,որ մարտի 18-ին 38 բեռնատարով սննդամթերք է ներմուծվել Հայաստան. «Բերվել է ձեթ՝ 18 տոննա, շաքար՝ 220 տոննա, ցորեն՝ 145 տոննա, հրուշակեղեն՝ 15 տոննա, սիսեռ 20 տոննա, արևածաղկի, դդմի սերմեր, սառեցված միս և նույնիսկ կարտոֆիլ: Լիարժեք ապահովված ենք նաև վառելիքով՝ բենզինով և դիզվառելիքով»:

Հրաչ Բերբերյանը չի կարծում, որ կորոնավիրուսով պայմանավորված իրավիճակը մեր երկրի պարենային անվտանգության համար խնդիրներ կստեղծի: «Մենք մեզ կարող ենք ապահովել կարտոֆիլով, բանջարեղենով, մրգով, մսամթերքով, կաթնամթերքով: Մեր միակ խնդիրը հացազգիներն են, որը մենք մշտապես պետք է ներկրենք, որովհետեւ ցանքատարածություններ չունենք, բայց կարելի է եղած ցանքատարածությունները չ պակասեցնել, ոնց որ այս տարի կառավարության մեղքով պակասում է»,-ասաց Հրաչ Բերբերյանը՝ խնդրահարույց համարելով, որ կառավարությունն անգամ սերմնացուի հարց չի լուծում գյուղացու համար:

«Ոչ պարարտանյութ, ոչ թունաքիմիկատներ…ես չգիտեմ, էդ մարդիկ ժամանակավոր տրամադրությո՞ւն ունենք »,-մտահոգվում է Հրաչ Բերբերյանը:

Անդրադառնալով վարչապետի հրապարակած տվյալներին, որոնք շատ փորձագետների կարծիքով ազգային անվտանգության խնդիր կարող են առաջացնել, քանի որ այդ ինֆորմացիան նաեւ սահմանից այնկողմ՝ հակառակորդն է լսում, Հրաչ Բերբերյանն ասաց.«Կարծում եմ հակառակորդը դրանից շատ բան չէր հասկանա, որովհետեւ լղոզված տվյալներ էին : Դա իմ կարծիքն է, բայց մի բան կարո եմ վստահ ասել, որ շատ մարդիկ այսօր կառավարությունում իրենք տեղում չեն»:

Աղբյուր` Փաստինֆո