Փաստ ինֆո

Ունենք եւս 7 հաստատված դեպք։ Դեպքերի ընդհանուր թիվը դարձավ 122։ Նոր դեպքերը կապված են արտադրամասում եղած օջախի հետ, ի սկզբանե մեր տեսադաշտում են եղել։ Սա, իհարկե, վիճակն ինչ-որ չափով լավացնում է, բայց ոչ ամբողջությամբ, որովհետեւ սպասում ենք, որ արտադրամասից ախտորոշված պացիենտների թիվը շատանալու է՝ կապված դրա մեծության եւ աշխատանքների կազմակերպման բնույթի հետ։ Այս մասին այսօր հրավիրված ասուլիսում ասաց ՀՀ Առողջապահության նախարար Արսեն Թորոսյանը։

Նա նշեց, որ հիվանդները հիմնականում չեն ջերմում․ «Շատ փոքր մասը՝ մոտ 40 տոկոսը, 37- 38 աստիճանի միջակայքում է ջերմում, մի քանի հոգի՝ 38- 39-ի միջակայքում, 39-ից բարձր ջերմություն չունենք, որովհետև նախ բժիշկների հսկողության տակ են և երկրորդն էլ իրոք նրանց առողջական վիճակը լավ է»։
Նախարարի փոխանցմամբ 60 տարեկանից բարձր 13 հիվանդ կա, սակայն նրանք առողջական շատ լուրջ խնդիր չունեն։

«Ուզում եմ մի քանի տվյալ ներկայացնել Իտալիայից, քանի որ դժբախտաբար այնտեղ մեծ թվեր կան և սպասում ենք, որ այսօր կամ վաղն այդ թվերը մահերի առումով կանցնեն Չինաստանից։ Նայելով բաշխվածքին՝ տեսնում ենք, որ հիմնականում մահերի կտրուկ աճը սկսում է 70-75 տարեկանից, որոնց մեծ մասը տղամարդիկ են՝ 72 տոկոսը»,-ասաց Թորոսյանը։

Նրա խոսքով, արական սեռի մահացության թիվը պայմանավորված է տղամարդկանց կենսաձևով ու այլ հիվանդությունների առկայությամբ․ «Թոքերի հիվանդությունները, սրտի հիվանդությունները, շաքարային դիաբետը, ինսուլտը, ինֆարկտը, այդ ամենը բարդացնում է հիվանդության ընթացքը»։

Թորոսյանի խոսքով, մահերի թիվն ուղիղ կապված է ազգաբնակչության առողջական վիճակի հետ։

«Ինչքան էլ, որ որոշ ոչ այնքան հավաստի աղբյուրներ փորձեն ծխելու դերը համարել դրական գործոն, ուղիղ կապ կա թոքերի վատ վիճակի ու մահացության հետ, իսկ թոքերը, գիտեք, ինչից են վնասվում։ Եվ տղամարդկանց մահացության մեծ թիվը հիմնականում կապված է ծխելու և ոչ առողջ սննդի հետ»,-ասաց նախարարն ու ավելացրեց, որ տղամարդիկ կանանց համեմատ 2,5 անգամ ավելի շատ են մահանում կորոնավիրուսից։

Հեղինակ՝ Սոնա Գեւորգյան

Աղբյուր` Փաստինֆո