Փաստ ինֆո

Խոսքի ազատության պաշտպանության կոմիտեի նախագահ Աշոտ Մելիքյանը համակարծիք է մի շարք լրատվականների կողմից հնչեցված մտահոգությունների հետ ու նշում է, որ Արտակարգ դրություն հայտարարելու որոշման մեջ ԶԼՄ-ների գործունեության հետ կապված մի շարք անորոշություններ կան։

«Կարծում եմ, որ այս որոշումը չպետք է խաթարի լրատվամիջոցների գործունեությունը, այլ ուղղակի պետք է կանոնակարգի կորոնավիրուսին վերաբերող նյութերի ի հայտ գալն ու հրապարակումը։ Ամեն դեպքում կառավարությունը չի կարող այս փաստաթղթով սահմանափակում մտցնել այլ թեմաները լուսաբանելու հարցում։ Մասնավորապես, եթե նունիսկ թեման կապված է կորոնավիրուսի հետ, ապա դրա տնտեսական, քաղաքական հետևանքները լուսաբանելը շատ կարևոր է»,- «Փաստինֆո»-ի հետ զրույցում ասաց Մելիքյանը։

Բանախոսն ընդգծեց, որ այն անորոշությունները, որոնք առկա են կառավարության որոշան մեջ, որոշ պաշտոնյաներ կարող են յուրովի մեկնաբանել ու եղած սահմանափակումներից զատ այլ անհիմն սահմանափակումներ մտցնել։

Նրա կարծիքով` ճիշտ մոտեցում կլիներ, եթե լրատվականների առաջ պահանջ դրվեր՝ ներկայացնել ստուգված փաստեր, կոնկրետ աղբյուրներին հղում կատարել և պարտադիր լիներ պետական կառույցների մեկնաբանությունները։

«Բայց այս ամենը չի նշանակում, որ լրատվամիջոցը չի կարող այլ աղբյուրներից տեղեկություններ ստանալ, հատկապես, որ այդ տեղեկությունները կարող են հանրային մեծ նշանակություն ունենալ, դա արգելելն ուղղակի խոսքի ազատության սահմանափակում է, այն էլ անհիմն սահմանափակում։ Այլ հարց է որ կառավարությունը կարող է պահանջել, որ այլ աղբյուրներից ունեցած տեղեկությունները պետք է պարտադիր մեկնաբանվեն պաշտոնական աղբյուրների կողմից»,-ասաց Խոսքի ազատության պաշտպանության կոմիտեի նախագահը։

Հարցին ստեղծված իրավիճակը կարո՞ղ է հանգեցնել գրաքննության` Մելիքյանը պատասխանեց․ «Ամեն ինչ կախված է նրանից, թե պրակտիկայում ինչպես են կիրառվելու այդ դրույթները։ Բայց ահազանգերն ու մտահոգիչ փաստերն արդեն կան ու, կարծում եմ, որ լրագրողական հանրությունը պետք է ակտիվորեն շարունակի ներկայացնել իր պահանջները։ Նաև անհրաժեշտ է, որ արդեն արտակարգ դրությունից հետո, եթե այս սահմանափակումները կիրառելու փորձեր լինեն, լրագրողական կազմակերպություններն ու լրատվամիջոցներն ակտիվորեն հակազդեն»։

Անդրադառնալով ստեղծված իրավիճակին, երբ պաշտոնյաները մեկը մյուսին հաջորդելով ֆեյսբուքյան ուղիղ եթերներով են տեղեկություն հայտնում կամ էլ ֆեյսբուքյան գրառումներ կատարում` չնայած որ տեղեկտվության մեկ պաշտոնական աղբյուր պետք է լիներ, Խոսքի ազատության պաշտպանության կոմիտեի նախագահն ասաց․ «Պաշտոնատար անձինք, կարծում եմ, հասկանալով, որ հանրությունը շատ ուշադիր է ստեղծված իրավիճակի նկատմամբ, հաճախ ուղիղ եթեր են մտնում և լրատվամիջոցները նրանց տեղեկատվությունը կարող են օգտագործել։ Համոզված եմ, որ որակյալ աշխատանքի դեպքում, այնուամենայնիվ, ԶԼՄ-ները կարող են իրենց աղբյուրներն օգտագործել, հավաքել այլ աղբյուրներից տեղեկատվություն և դիմել պաշտոնական ատյաններին՝ այդ տեղեկությունները մեկնաբանելու համար: Այս պարագայում որևէ խնդիր պետք է որ չառաջանա»:

Աշոտ Մելիքյանն ընդգծեց, որ եթե լրատվականների հայթայթած տեղեկությունները պետական ատյանների կողմից մեկնաբանվելուց հետո հրապարակվեն և ապա դժգոհություն կամ արգելք կլինի կառավարության կողմից, ապա լրագրողնական կազմակերպություններն իրենց ձայնը կբարձրացնեն ու անթույլատրելի կհաարենք նման պահվածքը։

Հ.Գ. Նշենք, որ արդեն մի քանի խմբագրություններ գրություններ են ստացել տարբեր նյութեր, անգամ տնտեսական գործիչների վերլուծությունները, կամ այլ երկրում առկա վիճակի վերաբերյալ հանելու վերաբերյալ: Ընդ որում` առանց որեւէ մեկնաբանության կամ հիմնավորման, թե տվյալ նյութը ինչպես է առաջացնում խուճապ կամ նպաստում դրա տարածմանը:

Աղբյուր` Փաստինֆո