Փաստ ինֆո

Մենք լավին ասում ենք՝ լավ։ Լավ է, որ քաղաքապետն այժմ մեզ հետ է, վարում է նիստը։ Լավ է, որ քաղաքապետարանը որոշում կայացրեց մանկապարտեզներում կուտակված պարենը սոցիալապես անապահով ընտանիքներին վերաբաշխել։ Այս մասին Երևանի ավագանու այսօրվա նիստի ժամանակ ասաց ավագանու «Լույս» խմբակցության ղեկավար Դավիթ Խաժակյանը։

Նա նշեց, որ լավին ասելով՝ լավ, պետք է նշել, որ այս տարվա եկամուտների մասն իսկապես կատարվել է․ «Մենք ունենք մտահոգություններ առանձին մուտքերի մասով, բայց, ընդհանուր առմամբ եկամտային մասը կատարվել , և սա լավ է, կամ ինչպես ընդունված է ասել՝ սա նորմալ է։ Նորմալ բաներին հիմնականում չենք անդրադառնում, արձանագրում ենք, որ դա ունենք ու կենտրոնանում անելիքների վրա»։

Խաժակյանի խոսքով, 2019թ-ի բյուջեն իր ծախսային մասով գերազանցել է 2018թ-ի անցումային շրջանին։

«Նախադպրոցական հաստատությունների հիմնանորոգման և վերանորոգման համար Երևանի ավագանին նախատեսել է 1մլրդ 397 մլն դրամ։ Ես ուզում եմ հասկանալ, թե ինչ սրտով ենք մենք այս կատարողականին կողմ քվեարկելու, եթե կատարվել է նախատեսված գումարից 125մլն դրամը, որը կազմում է 10 տոկոսը։ Այսինքն` մենք ունենք 90 տոկոս և ավելի թերակատարում, ինչը նշանակում է, որ մեր հարկատուները վճարել են, որպեսզի 2019թ-ի համար մանկապարտեզներ վերանորոգենք և մենք ծախսել ենք այդ գումարի ընդամենը 10 տոկոսը»,-ասաց «Լույս» խմբակցության ղեկավարը։

Խոսելով կանաչապատման խնդիրների մասին, Խաժակյանն ասաց, որ սրա մասին ամբողջ տարվա ընթացքում բարձրաձայնում էին, հարցնում՝ ինչու է կանաչապատման ծախսը կրճատվել․ «Մեզ տրամաբանությանը մոտ փաստարկ էին ներկայացնում, ասում, որ չենք պատրաստվում առանց ոռոգման ցանցի առկայության մեծ գումարներ ծախսել կանաչապատման վրա։ Չեմ խոսում նրա մասին, որ եղածն էլ մենք վնասեցինք»։

Խմբակցության ղեկավարն ընդգծեց, որ ոռոգման ցանցի համար ավագանին նախատեսել էր 154 մլն դրամ, սակայն եղել է 30 տոկոսի կատարողական։

«Կարող էինք 70 տոկոսով ավել աշխատանք կատարել վերանորոգելու համար ոռոգման ցանցը, սակայն չենք արել։Այս հարցի հետ փոխկապակցված է նաև թեքահարթակների հարցը։ Մեր քաղաքային իշխանություններն անընդհատ խոսքի մակարդակում ասում են, որ պետք է մատչելիություն ապահովել քաղաքում։ 2019թ-ի համար Երևանի ավագանին թեքահարթակների համար նախատեսել էր 100մլն դրամ, որից կատարվել 27մլն-ը»,-ասաց Խաժակյանը։

Հեղինակ՝ Սոնա Գեւորգյան

Աղբյուր` Փաստինֆո