Փաստ ինֆո

Դիմակները պետք է փոխվեն 3-4 ժամը մեկ անգամ, չփոխվող դիմակներն ավելի վտանգավոր են, քան առանց դիմակի լինելը։ Այս մասին այսօր հրավիրված ասուլիսում ասաց ՀՀ առողջապահության նախարար Արսեն Թորոսյանը։

Նա նշեց, որ դիմակների վրա կուտակվում են թե՛ վիրուսները, թե՛ միկրոօրգանիզմները, թե՛ փոշին։

«Հետևաբար դիմակ կամ պետք է օգտագործել պատշաճ կերպով թե՛ որակի, թե՛ ձևի իմաստով, կամ էլ պետք է չօգտագործել։ Պարզապես դիմակ կրել փողոցում կամ փակ տարածքում, այն էլ այնպիսի դիմակ, որը չի պաշտպանելու՝ իմաստ չունի։ Պաշտպանելու են N95 կամ FFP3 հաստությամբ դիմակները, որոնք պետք է կրել պատշաճ, խիստ ամուր կպած լինելով ամբողջ դեմքին, որպեսզի որևէ օդ արանքից դուրս չգա»,-ասաց Թորոսյանը։
Նրա խոսքով, վիրուսակրի հետ շփվելիս պետք է պարտադիր կրել ամուր ակնոցներ, որոնք հերմետիկ կփակեն աչքերը, քանի որ վիրուսի վարակը կարող է տեղի ունենալ աչքերի միջոցով։

«Հետևաբար, սովորական բժշկական դիմակ գնելու այս մեծ պահանջարկն այնքան էլ տեղի չէ, և իմաստ էլ չկա դա անելու։ Իմաստ կա դա կրելու բուժաշխատողների և հիվանդ մարդկանց դեպքում, հատկապես հիվանդանոցում գտնվելու ժամանակ, որի համար մենք ցուցումներ ենք տվել բժիշկներին, որպեսզի չվարակվեն պոտենցիալ վարակակիրներից»,-հայտնեց նախարարը։
Խոսելով ներկրումների մասին՝ Թորոսյանն ասաց, որ մոտ 3,5 մլն խմբաքանակի սահմանահատում է լինելու այսօր․ «Ճանապարհներին կուտակումներ են լինում, հստակ կճշտենք, հնարավոր է մեկ-երկու օր ուշացում լինի»։

Նա ընդգծեց՝ Չինաստանը աշխարհի դիմակների մատակարարն էր, և արտադրությունը դադարեցնելով մեծ խնդրի առաջ է կանգնեցրել ամբողջ աշխարհին․

«Նույն Իտալիայում հիմա դիմակ չկա, քանի որ նրանք դիմակների արտադրություն չունեն։ Լինելով այդպես հզոր տնտեսությամբ երկիր, նրանք դիմակ չունեն, քանի որ տնտեսապես ձեռք չի տվել դիմակների արտադրությունը , քանի որ չինական դիմակը եղել է էժան։ Հիմա Չինաստանը նոր սկսել է թափը մեծացնել, որովհետև երեկ առաջին օրն էր, որ կորոնավիրոսի նոր դեպք չի արձանագրվել ։ Սակայն գինը թանկ է, եթե չեմ սխալվում մեկ դիմակի համար Չինաստանում վճարում են մոտ 85 դրամ, այն դեպքում, երբ մինչ համաճարակն այն 2-3 դրամ էր»։

Նախարարի խոսքով, հիմա նաև աշխատում են ճանապարհներ գտնել՝ դիմակները Հայաստան հասցնելու համար, քանի որ մի շարք ուղղություններ չեղարկվում են։

Աղբյուր` Փաստինֆո