Փաստ ինֆո

Եղեգնաձորում դաժանաբար ծեծի ենթարկված փոխգնդապետ Արա Մխիթարյանի հարազատները ներպետական ատյանները սպառելուց հետո կդիմեն ՄԻԵԴ, եթե դրա անհրաժեշտությունը լինի: Այս մասին «Փաստինֆո»-ի հետ զրույցում ասաց Մխիթարյանի ներկայացուցիչ, փաստաբան Ռաֆայել Ամիրխանյանը:

Փաստաբանը հայտնեց, որ Վերաքննիչ քրեական դատարանի որոշումը դեռևս չեն ստացել և համապատասխան դիրքորոշում կներկայացնեն միայն որոշումը ստանալուց հետո: Դիտարկմանը, որ Վայոց Ձորի նախկին մարզպետ Տրդատ Սարգսյանը, ըստ պաշտոնական տեղեկատվության, չի եղել դեպքի վայրում, փաստաբանն արձագանքեց՝ նշելով, որ կան վկաներ, այդ թվում՝ տուժողներ, որոնք միանշանակ պնդում են, որ Տրդատ Սարգսյանին տեսել են դեպքի վայրում և նույնիսկ զրուցել են նրա հետ:

Անդրադառնալով պաշտպանական կողմի պնդմանը, որ Արա Մխիթարյանը եղել է ոգելից խմիչքի ազդեցության տակ և վիճաբանությունը սկսվել է նրանից, փաստաբանն ասաց, որ Արա Մխիթարյանի ՝ ոգելից խմիչքի ազդեցության տակ գտնվելու և մեղադրյալ Զավեն Գրիգորյանին կալանքից ազատ արձակելու մեջ կապը չի տեսնում: «Չեմ կարծում, որ այս ամենի մեջ կապ կա»,- նշեց փաստաբանը:

Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում եւ արդեն 6 ամիս է, ինչ գտնվում է կոմայի մեջ։

Ըստ պաշտոնական հաղորդագրության` միակ մեղադրյալը Վայոց Ձորի նախկին մարզպետ Տրդատ Սարգսյանի օգնականի եղբայրն է՝ Զավեն Գրիգորյանը, թեեւ մամուլի տեղեկություններով, հարազատների պնդմամբ`փոխգնդապետի նկատմամբ կիրառված բռնությանն անմիջական մասնակցություն է ունեցել նաեւ Տրդատ Սարգսյանը, որը հենց այս աղմուկի հետեւանքով հայտարարեց լիազորությունները վայր դնելու մասին։ Միջադեպին մարզպետի ներկայության հանգամանքը իրենց ցուցմունքներում պնդել են նաեւ 3 վկաները։

Քրեական գործով միակ մեղադրյալը՝ Գրիգորյանը մարտի սկզբներին գրավի դիմաց ազատ է արձակվել։ Ընդ որում՝ նշված որոշումը կայացրել է Վերաքննիչ քրեական դատարանի դատավոր Արմեն Դանիելյանը, ով համարվում է վատագույն վարկանիշն ունեցող դատավորը։ 2019թ.-ին նա եղել է ամենացածր վարկանիշն ունեցող դատավորը՝ -43 միավորով, իսկ այս տարի արդեն -15 է։

Ծեծված փոխգնդապետի հարազատները պարբերաբար բողոքի ակցիաներ են իրականացնում՝ պահանջելով վերականգնել արդարությունը։Նրանք լիահույս են, որ Դատախազությունը Վերաքննիչ դատարանի որոշման դեմ Վճռաբեկ բողոք կներկայացնի: Թեև Դատախազությունն արդեն ստացել է Արա Մխիթարյանի գործով մեղադրյալ՝ Վայոց Ձորի նախկին մարզպետ Տրդատ Սարգսյանի օգնականի եղբորը՝ Զավեն Գրիգորյանին գրավի դիմաց ազատ արձակելու մասին դատարանի որոշումը, բայց առ այսօր որևէ դիրքորոշում չի ներկայացրել և հայտնի չէ՝ կբողոքարկվի արդյոք դատարանի որոշումը, թե ոչ:

Հեղինակ՝ Իզաբել Սահակյան

Աղբյուր` Փաստինֆո