Փաստ ինֆո

Պարետատան աշխատանքային հանդիպումների ու քննարկումների ժամանակ տեսչական մարմինը պարետին առաջարկել է` որոշումներ ընդունել աշխատողների առողջության ու ավտանգության պահպանումն ապահովելու վերաբերյալ։ Այս մասին այսօր հրավիրված ասուլիսում ասաց Առողջապահական և աշխատանքի տեսչական մարմնի ղեկավար Հակոբ Ավագյանը։
Նա նշեց, որ այս խնդրով դիմողները նշում են, որ գործիքակազմ չկա, որպեսզի գործատուներին պարտադրվի ապահովել աշխատողների համար անհրաժեշտ պաշտպանիչ միջոցներով ու պահպանեն սանիտարահիգիենիկ նորմերը։

«Այդ նպատակով մեր աշխատանքի և առողջության պահպանման վարչության կողմից մշակվել է պարետի ցուցումի նախագիծ, որն այսօր ներկայացվել է պարետատան քննարկման ժամանակ։ Այս պահին այն շրջանառվում է, կարծում եմ մինչև օրվա վերջ վերջնական նախագիծը պարետի կողմից հաստատված կունենանք»,-ասաց Ավագյանը։

Նա հայտնեց, որ բնակչությանը սպասարկող ընկերությունները, ըստ իրենց առաջարկի, պետք է ապահովված լինեն պաշտպանիչ միջոցներով և ժամանակին իրականացնեն ախտահանումները, ապահովեն նորմերի պահանջները։

Հարցին` արդյոք տեսչությունը համարում է, որ նաեւ իր բացթողումների հետևանքով Հայաստանում գրանցվեցին կորոնավիրուսի դեպքեր, նա պատասխանեց․ «Ես բազմիցս առիթ ունեցել եմ խոսելու իրականացվող գործողությոնների մասին, թե ում մեղքով էր և այլն, կարծում եմ այդ հարցը ճիշտ չէ ձևակերպել, քանի որ ոչ մի երկիր ապահովագրված չէ կորոնավիրուսի ներթափանցումից, անկախ նրանցից, թե աշխատանքները որքանով են ուժեղ, կամ որքնով են ժամանակին իրականացվում»։

Նա ընդգծեց, որ 7 սահմանային հսկիչ կետերում 2 անգամ ուժեղացվել է անձնակազմը․ «Այդ հսկիչ կետերից մեկը երկաթգծի հսկիչ կետն է, 2-ը օդային սահմանային կետերը, մյուսները ցամաքայիններն են։ Անձնակազմի տեխիկական և իրենց իսկ պաշտպանիչ միջոցներով համալրում է իրականացվել, նաև ապահովել ենք ախտահանիչ լուծույթներով, որպեսզի այնպիսի դեպքերում, երբ մեզ մոտ է տեղի ունենում մեկուսացումը, դրանից հետո ախտահանումներ իրականացվեն»։

Ավագյանն ընդգծեց, որ մինչ այս պահը ՀՀ մուտք գործած 4993 ուղեւորների համար լրացվել են հասցեական քարտեր, իսկ մարտի 10-ից հետո՝ ընդհանրապես ՀՀ ժամանած բոլոր ուղեւորների համար հավաքագրվել եւ լրացվել են հասցեական քարտեր․ վերջիններիս թիվը 19900 է։

«Այս քաղաքացիները չեն եկել անապահով երկրներից, բայց բացահայտվում են ինչ-որ դեպքեր, եւ պետք է լինում այդ ուղեւորների շարքում գտնել կոնտակտավորների։ Սահմանային հսկիչ կետերից հոսպիտալացում է եղել 65 անձի համար, 14 օրով մեկուսացվածների թիվն էլ հասնում է մոտ 100-ի, որտեղ ներառված են նաեւ վերջին՝ Իտալիայից հատուկ չվերթով ժամանած քաղաքացիները»,-ասաց Առողջապահական և աշխատանքի տեսչական մարմնի ղեկավարը։

Խոսելով Հայաստան մուտք գործող բեռնատարների ախտահանման մասին, Ավագյանն ասաց․ «Այս հարցը քննարկվել է թե՛ միջգերատեսչական հանձնաժողովում, թե՛ պարետատան աշխատանքների ժամանակ, և մենք նման ցուցում չունենք առողջապահության նախարարության կողմից, որպեսզի մեքենաների ախտահանման աշխատանքներ իրականացնենք։ Մեքենաներն իրենք իրենցով վիրուսակիր չեն, վիրուսը տեղափոխող չեն։ Եղել են դեպքեր, որ մենք Ուկրաինայից ժամանած վարորդի ենք մեկուսացրել, մեքենան կանգնեցվել է ՊԵԿ մաքսային տարածքում, մինչ հաջորդ վարորդն եկել է փոխարինելու նախորդին, մեքենայի խցիկն ախտահանվել է մեր աշխատակիցների կողմից»։

Աղբյուր` Փաստինֆո