Փաստ ինֆո

Թեեւ արտակարգ իրավիճակի հետ կապված իրավական կարգավորումների համաձայն, պաշտոնատար անձինք եւս ավտոմատ կերպով դառնում են պարետատան հաստատված աղբյուր, սակայն տեղեկատվության անվտանգության մասնագետները սա խնդրահարույց են համարում:

Ռազմական փորձագետ Կարեն Վրթանեսյանը «Փաստինֆո»-ի հետ զրույցում մտահոգություն հայտնեց, որ պաշտոնյաները, որոնք այս օրերին տեղեկություններ են հաղորդում կորոնավիրուսի թեմայով, նախկինում աչքի չեն ընկել տեղեկատվության փոխանցման հմտություններով, առավել եւս այժմ, երբ համաճարակային իրավիճակ է, ըստ Վրթանեսյանի, հարկավոր է տեղեկատվության հաղորդման պաշտոնական մեկ աղբյուր ունենալ:

«Ես այս մասին խոսում եմ, դեռ մարտի 1-ից, դա ամբողջ աշխարհում ընդունված աշխատելաոճ է, ճգնաժամային իրավիճակներում լուրեր հաղորդելու, բնակչությանը տեղեկություններ տրամադրելու համար միշտ դիմում են այդ միջոցին ՝ լինում է մեկ կետ, որտեղից մարդիկ ստանում են առավելագույնս ճշտված եւ վստահելի տեղեկություններ: Ցավոք սրտի, մեզ մոտ հիմա խոսում են բոլորը»,-ասում է Կարեն Վրթանեսյանը՝ շեշտելով, որ երբեմն նույն ինֆորմացիան հայտնվում է տարբեր աղբյուրներում եւ պարզ չէ, թե սկզբնաղբյուրը որն է:

Նշենք, որ կառավարության որոշմամբ արտակարգ դրության պայմաններում պարետ է նշանակվել փոխվարչապետ Տիգրան Ավինյանը: Կորոնավիրուսի վերաբերյալ տեղեկությունները շարունակում է հաղորդել վարչապետ Նիկոլ Փաշինյանը՝ ՖԲ-ի ուղիղ եթերից, այն դեպքում, երբ ինֆորմացիայի հիմնական աղբյուրը պետք է լիներ պարտեատունը:

«Օրինակ, նույն ինֆորմացիան արտագրելիս, վերապատմելիս, հնարավոր է ինչ-որ սխալներ լինեն այդ դեպքում էլ՝ սխալն ուղղելը ավելի դյուրին է լինում»,-նշում է Վրթանեսյանը:

Մասնագետը լուրջ խնդիր է համարում նաեւ կորոնավիրուսի վերաբերյալ ինֆորմացիայի հաղորդման անհամաչափ ու անտրամաբանական սահմանափակումները: «Օրինակ, արգելվում է արտասահմանյան աղբյուրների օգտագործումը եւ նաեւ արգելվում է խոսել այլ երկրներում կորոնավիրուսի հետ կապված տեղեկությունների մասին : Սա այն կարգի աբսուրդ է, որ օրինակ, «Լրագրողներ առանց սահմանների» միջազգային իրավապաշտպան կազմակերպությունը հայտարարել է, որ ինֆորմացիան սահմանափակելով համաճարակ չեն հաղթում»,-ասում է Կարեն Վրթանեսյանը:

Նշենք, որ «Լրագրողներ առանց սահմանների» միջազգային կազմակերպությունը հայտարարել էր, որ Հայաստանում տեղեկատվության վերահսկողությունը ոչ թե օգնում է պայքարել համաճարակի դեմ, այլեւ օգնում է բամբասանքներ եւ վախեր տարածել։

Կարեն Վրթանեսյանն ասում է՝ իհարկե, ինֆորմացիան պետք է վերահսկվի, բայց ոչ թե նման սահմանափակմամբ, այլ կեղծ տեղեկությունների դեմ պայքարելով: «Ցավոք սրտի չստուգված, սխալ տեղեկությունների հիմնական տարածողը այսօր վարչապետ ՆԻկոլ Փաշինյանն է: Օրինակ, առայսօր նա փորձում է փափուկ բարձ դնել մարդկանց գլխի տակ ու ասում է, որ շատ մարդիկ հիվանդանում են եւ նույնիսկ չեն էլ իմանում այդ մասին, միեւնույն ժամանակ, նույն ինքը դրան հակասող հայտարարություն է անում, թե մենք բոլոր վարակվածների վերաբերյալ տեղեկությունները հաղորդում ենք: Այս պարագայում հարց է առաջանում , եթե մարդիկ առանց ախտանշանի տանում են վարակը եւ չեն հիվանդանում, ապա ո՞վ է նրանց ստուգել եւ որտեղի՞ց գիտեն, որ հիվանդ են»,-շեշտում է Վրթանեսյանը:

Կարեն Վրթանեսյանի խոսքով, որքան ավելի շատ թվով պաշտոնյա է չհամաձայնեցված խոսում , նույն խուճապի տարածման հնարավորությունը ավելանում է, որովհետեւ խուճապն առաջանում է այն բանից, հետո, երբ հակասական տեղեկություններ ենք ստանում պաշտոնական աղբյուրներից: «Մենք չենք կարող մարդկանց ստիպել, որ իրենք ինֆորմացիա ստանալուց հրաժարվեն եւ սպասեն միայն պաշտոնականին, որովհետեւ , եթե պաշտոնականի մեջ մեկ-երկու հակասություն եղավ, մարդիկ դադարելու են դրանց հավատալ, ինչն ավելի վատ է, որովհետեւ խաղի մեջ կմտնեն ոչ թե ավանդական մամուլը, որը քիչ թե շատ հայտնի կայքերն ու թերթերն են, որոնք ունեն պատասխանատվության զգացում, այլ անհասկանալի խաղացողներ՝ անանուն կայքեր, յութուբյան ալիքներ ու չենք էլ իմանալու, թե ովքեր են նրանք, օրինակ, ադրբեջանցինե՞րն են ստեղծել, որ խուճապ տարածեն անհրաժեշտ դեպքում»,-շեշտում է Վրթանեսյանը:

Աղբյուր` Փաստինֆո