Փաստ ինֆո

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը կասկածներ ունի, որ Ռոբերտ Քոչարյանի գործով դատական նիստը միտումնավոր է հետաձգվել։ Այս մասին փաստաբանն ասել է դատարանում պատասխանելով լրագրողների հարցերին ։

«Ընդհուպ մինչև ուրբաթ օրը, հատկապես պարոն Վարդևանյանը շատ համառորեն փորձում էր ճշտել, թե արդյոք կա որևէ բան, որ կարող է խոչընդոտել դատական նիստին։ Վերջում իրեն հստակորեն ասել են, որ նիստը տեղի է ունենալու»,- ասաց Ալումյանը՝ հավելելով, որ դրանից հետո՝ երկուշաբթի, Ռ.Քոչարյանին անձնական երաշխավորությամբ ազատ արձակելու միջնորդությունը մուտք են արել դատարան։

Փաստաբանը կասկածներ ունի, որ դատական նիստը հետաձգվել է, որպեսզի ոչ բոլոր երաշխավորողները հնարավորություն ունենան նիստին ներկա գտնվելու։
Քրեական դատավարության օրենսգրքի համաձայն՝ երաշխավորության միջնորդության քննարկման ժամանակ նաեւ երաշխավորողները պետք է ներկա լինեն դատական նիստին։ Ըստ փաստաբանի՝ կասկածներ կան, որ նիստը միտումնավոր ձգձգվում է, որպեսզի 4 երաշխավորողներից 1-2 հանրապետությունում չլինեն։ Ինչպես արդեն տեղեկացրել ենք՝ ՀՀ երկրորդ նախագահի համար երաշխավորել են Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։

Հայկ Ալումյանը հայտարարեց, որ հաջորդ դատական նիստին պահանջելու են, որ դատարանը տեղեկատվություն տրամադրի առողջական խնդիրների մասին, որոնք ունեցել է և, եթե բուժում է ստացել, ապա երբ է ստացել։

Հիշեցնենք, որ այսօրվա դատական նիստը տեղի չի ունեցել դատավոր Աննա Դանիբեկյանի առողջական խնդիրների պատճառով։ Հարցին, թե կասկածում են նշված պատճառաբանությանը՝ փաստաբանը նկատեց. «Եթե դատարանն իրեն թույլ է տալիս ՀՀ երկրորդ նախագահի առողջական վիճակի հետ կապված ամեն ինչը դետալային հրապարակել, եթե ինքը համարում է, որ դա թույլատրելի միջոց է, ապա դատարանն առավել ևս պետք է նույն մոտեցումից ելնելով իր առողջական վիճակի վերաբերյալ սպառիչ ներկայացնի ։

Մարտի 17-ին նշանակված դատական նիստի հետաձգման մասին կողմերն իրազեկվել էին հեռախոսազանգի միջոցով։ Այդուհանդերձ՝ Ռոբերտ Քոչարյանի և Յուրի Խաչատուրովի պաշտպաններն այսօր ներկայացել էին դատարան, քանզի դատական նիստի հետաձգման մասին, ըստ կարգի, պետք է հայտարարվի դատական նիստում։ Նրանք տեւական ժամանակ գտնվում էին նիստերի դահլիճում՝ սպասելով, որ իրավասու անձ ներկայանա ու, սահմանված կարգով, հայտարարի նիստի հետաձգման մասին։

Աղբյուր` Փաստինֆո