Փաստ ինֆո

Սպիրտի գնի աճը կապված է հարկային օրենսդրության փոփոխության հետ, որովհետև փոխվել է սպիրտի նվազագույն գինը։ Կորոնավիրուսից առաջ և հետո գնային փոփոխություն տեղի չի ունեցել։ Այս մասին ֆեյսբուքյան այսօրվա ուղիղ եթերի ժամանակ ասաց ՀՀ վարչապետ Նիկոլ Փաշինյանը։

Նա արձանագրեց, որ նպարեղենի հետ կապված գնային փոփոխություններ կան, ինչը կապված է խուճապային ու ճգնաժամային գնումների հետ։
«Ես կոչ կանեմ մեր հայրենակիցներին՝ ճգնաժամային ու խուճապային գնումներ չիրականացնել, որովհետև այսօր առավոտյան էլ ասվել է, որ խանութները, ցանցերը որևէ ապրանքի պակասություն չունեն պահեստներում։ Ինձ ասում են, որ խոշոր սուպերմարկետների ցանցերի առևտուրն աճել է միջինում 30-40 տոկոսով, իսկ փոքր կրպակների առևտուրը հակառակը՝ նվազել է։ Սիրելի հայրենակիցներ, ես ուզում եմ ձեզ կոչ անել, որ փոքր և միջին բիզնեսի մասին չմոռանաք»,-շեշտեց Փաշինյանը։

Նա անդրադարձավ ֆինանսական շուկային ու ասաց, որ այն Հայաստանում կայուն ու ուժեղ է, մանավանդ անցյալ տարվա ցուցանիշներից հետո, երբ Հայաստանն իր միջազգային պահուստները հասցրել է ռեկորդային մակարդակի։

«Կենտրոնական բանկն աննախադեպ մեծ ծավալի արտարժույթ է գնել և պահուստավորել, այնպես, որ այստեղ մենք խնդիր չենք ունենալու և ամեն ինչ լավ է լինելու»,-նշեց վարչապետը։

Փաշինյանի խոսքով, տնտեսական նպաստի տրամադրմանն ինքը դեմ է․ «Մենք ոչ թե պետք է տնտեսական նպաստ տանք, այլ պետք է համոզվենք, որ այդ աջակցության արդյունքում ընկերությունները, բիզնեսը դառնալու են ավելի ուժեղ։ Հայաստանը 2018-19 թթ․ մեծ պոտենցիալ է կուտակել՝ տնտեսական ռեստարտ, տնտեսական հեղափոխություն իրականացնելու համար, և այն, իհարկե, կօգտագործվի, որ մենք այս իրավիճակից դուրս գանք ավելի ուժեղացած տնտեսությամբ»։

Ամփոփելով խոսքը ՀՀ վարչապետն ասաց, որ մարդիկ անհանգստացած են, բայց հանդարտ են։ Ապա ավելացրեց, որ ՀՀ կառավարության փորձը ցույց է տալիս, որ կորոնավիրուսը կառավարելի է և կարող է լինել կառավարելի նաև երկարաժամկետ առումով։

«Կոչ եմ անում հանգստությունը պահպանել։ Բոլոր ուղղություններով իրավիճակը կայուն է, վերահսկվում է, բոլորս պետք է պայմանավորվենք, որ այս ճգնաժամը մեզ համար 0-ական կետ է, որից պետք է կառուցենք բոլորովին նոր իրականություն․․․եթե նույնիսկ ինչ-որ մեկը կորոնավիրուսով վարակվել է, մենք պետք է հասկանանք, որ սա ի վերջո շատ շուտով բոլորիս համար դառնալու է այնպիսի հիվանդություն, ինչպիսին է սովորական հարբուխը։ Մեզ կորոնավիրուսով չեն վախեցնի, կորոնավիրուսը մեզ չի վախեցնի ու ընդհանրապես ոչ մեկ ու ոչինչ մեզ չի վախեցնի»,-շեշտեց նա։

Աղբյուր` Փաստինֆո