Փաստ ինֆո

Այսօր հանդիպում ենք ունեցել հեռահաղորդակցության ոլորտի մեծ ընկերությունների հետ և հավաստիացրել, որ տեխնիկական սպասարկման, ինչպես նաև հեռահաղորդակցության ապահովման տեսանկյունից որևէ խնդիր չունենք։ Մամուլի ասուլիսի ժամանակ այս մասին հայտարարեց Բարձր տեխնոլոգիական արդյունաբերության նախարար Հակոբ Արշակյանը։

Նախարարի խոսքով Աան խոցելի տեխնիկական օղակները, որտեղ հնարավոր է որոշակի ռիսկեր ամբողջությամբ բացահայտված են և այդ ուղղությամբ աշխատանքներ են տարված։ Հակոբ Արշակյանը վստահեցրեց` արտակարգ դրության ժամանակ հեռահաղորդակցության ոլորտում որևէ խնդիր չենք ունենա։

Սպասարկման ոլորտում կան որոշակի սահմանափակումներ, այնուամենայնիվ որոշակի կենտրոնական հատվածներում գործում են սպասարկող գրասենյակներ, բայց դրանց թիվը նույնպես սահմանափակ է։

«Բոլոր օպերատորներն ունեն առցանց վճարման հնարավորություններ։ Ունենք առցանց վճարման այլ հարթակներ»,- ասաց Հակոբ Արշակյանը` քաղաքացիներին կոչ անելով օգտվել վճարման առցանց հարթակներից։

Ամբողջ Հայաստանի տարածքում ռադիո և հեռուստահաղորդումների տարածման տեսանկյունից խնդիր նույնպես չենք ունենա։

Անդրադառնալով փոստային ծառայությանը` Հակոբ Արշակյանն ասաց. «Փոստը հիմնականում կենսաթոշակների և սոցիալական վճարների հիմնական օղակն է ։ Այս տեսանկյունից մենք որևէ ընդհատումներ կամ խափանումներ չենք ունենա։ Փոստային բաժանմունքները կգործեն ըստ իրավիճակի։ Այս պահին էլ ամբողջ ծավալով գործում են և իրենց ծառայություններն են մատուցում։ Այնուամենայնիվ որոշակի գործիքակազմ է կիրառված` կապված անվտանգության և վիրուսի տարածումը կանխարգելելու հետ»,-նշեց Հակոբ Արշակյանը։

Աղբյուր` Փաստինֆո