Փաստ ինֆո

«Մարտի 1»-ի գործով քննչական խմբի նախկին ղեկավար Վահագն Հարությունյանն ազատ է արձակվել արգելանքից՝ ՌԴ օրենսդրությամբ սահմանված քրեական պատասխանատվության վաղեմության ժամկետն անցնելու հիմքով։ Այս մասին «Փաստինֆո»-ին հայտնեց Դատախազության հանրային կապերի բաժնի պետ Արևիկ Խաչատրյանը։

«ՌԴ դատախազության դատախազի կողմից Վահագն Հարությունյանն ազատ է արձակվել ձերբակալումից՝ վերջինիս մեղսագրվող արարքի համար հանձնող երկրի՝ այսինքն Ռուսաստանի Դաշնության օրենսդրությամբ սահմանված քրեական պատասխանատվության վաղեմության ժամկետն անցնելու հիմքով»,- նշեց Արևիկ Խաչատրյանը:

Ինչպես արդեն հայտնել ենք ՝Վ.Հարությունյանի՝ Ռուսաստանում ձերբակալվելու մասին հայտնի էր դարձել մարտի 15-ին, սակայն մեկ օր անց նա ազատ արձակվեց։ Ճիշտ է, Վ.Հարությունյանը 2018 թվականի հոկտեմբերից պաշտոնապես գտնվում է հետախուզման մեջ, սակայն նրա նկատմամբ ընտրված խափանման միջոց չկա. վերաքննիչ քրեական դատարանը նախկինում մերժել էր նրան կալանավորելու ՀՔԾ քննիչի միջնորդությունը։ Մարտի 16-ին հայտնի է դարձել, որ Հարությունյանն ազատ է արձակվել արգելանքից։

«Փաստինֆո»-ի տեղեկություններով՝ ՀՔԾ քննիչը նոր միջնորդություն է ներկայացրել՝ պահանջելով Հարությունյանի նկատմամբ որպես խափանման միջոց ընտրել կալանավորումը։

Հիշեցնենք, որ Վահագն Հարությունյանը որպես մեղադրյալ է ներգրավվել ՀՀ ՔՕ 38-349 հոդվածի 3-րդ մասի 1-ին կետով (ապացույցներ կեղծելուն հանցակցելը, որը կատարվել է ծանր կամ առանձնապես ծանր հանցագործությունների վերաբերյալ գործերով), 308–րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ) եւ 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով): Նա հայտարարել է, որ չի ընդունում առաջադրված մեղադրանքը՝ այն որակելով ապօրինի եւ պատրաստակամություն հայտնել ընդհատել Ռուսաստանում իր բուժումն ու վերադառնալ Հայաստան, եթե Հայաստանի իրավապահները վերացնեին հետախուզումը, սակայն հետախուզումը չվերացվեց։

Հեղինակ՝ Իզաբել Սահակյան

Աղբյուր` Փաստինֆո