Փաստ ինֆո

Այսօր Վանաձոր-Սպիտակ ավտոճանապարհին կողաշրջված «ՊԱԶ» ավտոբուսը Սպիտակի ֆաբրիկայի աշխատակիցներին տեղափոխում էր Վանաձորի «Գլորիա» կարի ֆաբրիկա։

«Փաստինֆո»-ի հետ զրույցում ֆաբրիկայի տնօրեն Բագրատ Դարբինյանը մանրամասնեց` ավտոբուսի ուղևորները Սպիտակի ֆաբրիկայի նոր աշխատակիցներն են, որոնք ցանկանում էին պատվեր ստանալ «Գլորիա» ֆաբրիկայից. «Մեր պատվերները շատ կարևոր արտասահմանյան պատվերներ են։

Պայմանավորվել էինք, որ գային մեզ մոտ, սովորեցնեինք։ Պետք է գային մի քանի օր պայմաններին ծանոթանային, ֆիրմայի ներկայացուցչի ներկայությամբ ծանոթանային որակի պահանջներին, դրանից հետո նոր կարողանային աշխատել։ Այսօր պետք է գային էն էլ խեղճ ժողովուրդը վթարի ենթարկվեց»,-ասաց Բագրատ Դարբինյանը։

Վերջինս նշեց` իրենց մոտ կա ցուցակ, որ պետք է ընդունեին ու տեղավորեին 22 հոգու, սակայն տեղյակ չէ վթարի ենթարկված ավտոբուսում միայն այդ 22 հոգին են եղել, թե ոչ։

«Նրանց պատասխանատուն զանգեց ինձ և ասաց, որ հիվանդանոցում են։ Մի երկու-երեք հոգ ձեռք, ոտքն է կոտրված, մյուսների մոտ ամեն ինչ նորմալ է։ «Opel» մակնիշի ավտոմեքենան ավտոբուսին խանգարել է դիմացից, ինքն էլ ուզեցել է խուսափի Opel-ից և շրջվել է կողքի վրա։ Բարեբախտաբար ոչ մեկի կյանքին վտանգ չի սպառնում»,- հավելեց «Գլորիա» կարի ֆաբրիկայի տնօրենը։

Ավելի վաղ հայտնել էինք, որ մարտի 17-ին` ժամը 08:43-ին ԱԻՆ ճգնաժամային կառավարման ազգային կենտրոնն ահազանգ է ստացել, որ Վանաձոր-Սպիտակ ավտոճանապարհին տեղի է ունեցել ՃՏՊ։

Պարզվել է, որ Վանաձոր-Սպիտակ ավտոճանապարհի 13-րդ կմ-ին «ՊԱԶ» ավտոբուսը դուրս է եկել երթևեկելի հատվածից և կողաշրջվել, կան տուժածներ։

Աղբյուր` Փաստինֆո