Փաստ ինֆո

Ալկոգելերի հետ կապված արդեն երեք վարույթ ենք հարուցել։ Մամուլի ասուլիսի ժամանակ այս մասին հայտարարեց Տնտեսական մրցակցության պետական պաշտպանության հանձնաժողովի նախագահ Գեղամ Գևորգյանը։

Նա նկատեց՝ որոշակի անձինք փորձել էին համացանցով ալկոգելի անվան տակ վաճառել բարձր գնով ալկոգել, որն արտադրողներինը չէր. «Մենք հայտնաբերում ենք և խիստ պատասխանատվության ենթարկում։ Նրանք, ովքեր տնտեսվարող սուբյեկտ չեն լինի, կլինեն ֆիզիկական անձինք, որոնք list.am-ով կամ այլ կայքերում կփորձեն վաճառել, կզբաղվեն ապօրինի ձեռնարկատիրությամբ, նյութերը կփոխանցվեն ՊԵԿ և համապատասխան գործողություններ կիրականացվեն»,-հավելեց Գեղամ Գևորգյանը։

Վերջինս հավելեց ալկոգել արտադրող ՀՀ երեք խոշորագույն ընկերությունների հետ ամենօրյա կապի մեջ են և նրանք որևէ դրամ չեն բարձրացրել.«Երեք ամիս առաջ էլ է նույն գինը եղել, այսօր էլ է նույն գինը։ Ուղղակի երեք ամիս առաջ մարդիկ ալկոգել չէին օգտագործում և դժվար թե հիշեն այն ժամանակ ինչ գին է եղել»,-ասաց Գեղամ Գևորգյանը հավելելով, որ կփորձեն ամենօրյա ռեժիմով հրապարկել գները։

Ինչ վերաբերում է դիմակներին, ապա ՏՄՊՊՀ նախագահի խոսքով ամբողջ աշխարհում թանկացում կա.«Մենք նայել ենք պահեստներում այն դիմակները, որոնք ձեռք են բերվել էժան և փորձել ենք կանխել ու վերահսկել, որ դրանք էժան վերավաճառվում։ Իսկ հիմա դիմակի ձեռքբերումն ավելի է բարձրացել։ Այս պահին նաեւ ուրախալի լուր, Չինաստանի պահեստները, որոնք այս պահին փորձում են արտահանում կատարել և այլևս իրենց մոտ պահելու խնդիր չունեն, մեզ գնաառաջարկներ են ուղարկում»,-ասաց Գեղամ Գևորգյանը։ Վերջինս հավելեց, որ երեկվա դրությամբ 84 դրամով մեծածախի առաջարկ կար, ինչը նշանակում է` գինն իջնում է։

Աղբյուր` Փաստինֆո