Փաստ ինֆո

Թեստավորման են ենթարկվում այն անձինք, որոնց մոտ առկա են կլինիկական ախտանիշներ՝ տաքություն, հազ, շնչառության դժվարացում և միաժամանակ տվյալ անձը ճամփորդել այն երկրներում, որտեղ համաճարակաբանական լարված իրավիճակ է։ Այս մասին այսօր հրավիրված ասուլիսում ասաց Առողջապահության փոխնախարար Լենա Նանուշյանը։

«Երբ անձին մեկուսացնում ենք, և 14 օր շարունակ հետևում ենք իրենց, բժշկական հսկողոություն ենք սահմանում, եթե իրենց մոտ զարգանում է կլինիկական ախտանիշ ու պարզվում է, որ այն դրական է, կոնտակտավորների շրջանակը շատ ավելի նեղ է լինում։ Դրա համար են մեկուսացման աշխատանքները»,-ասաց նա։
Նա նշեց, որ մինչև այս շաբաթվա վերջ Հայաստանը 5000-ից ավելի թեստ կունենա և դա լիովին բավարար է․ «Սակայն դա չի նշանակում, որ մենք աշխատանքներ չենք իրականացնում նոր թեստեր ձեռք բերելու համար։ Աշխատանքներն ամենօրյա ռեժիմով շարունակվում են»։

Պատասխանելով հարցին, թե ինչու վարչապետի հետ սննդի կետում գտնվող լրագրողներին ու անվտանգության աշխատակիցներին չեն թեստավորել, Նանուշյանն ասաց․ «Թեստավորում ենք անում, եթե կլինիկական ախտանիշներ կան, ջերմություն է առկա, հազ, շնչառության դժվարացում։ Եվ երկրորդ պայմանը ՝ եթե անձը ժամանել է համաճարակաբանության առումով լարված երկրներից կամ շփում է ունեցել դրական դեպքի հետ։ Եթե կլինիկական ախտանիշ չլինի, բայց անձը շփում ունեցած լինի կորոնավիրուսով հիվանդի հետ, մենք իրեն մեկուսացնում ենք 14-օրյա ռեժիմով ։ Եթե կլինիկական ախտանիշների զարգացում է լինում՝ թեստավորում ենք, բացասական լինելու դեպքում շարունակում ենք բժշկական հսկողությունը, իսկ դրական լինելու դեպքում հոսպիտալացնում ենք և անհրաժեշտության դեպքում տրամադրում բուժում»։

Նանուշյանը նշեց, որ անհրաժեշտության դեպքում է տրամադրվում բուժում, քանի որ լինում են դեպքեր, երբ դրա կարիքը չի լինում։

ՀՀ վարչապետ Նիկոլ Փաշինյանի մամուլի խոսնակն էլ ավելացրեց, որ վարչապետի աշխատակազմը առողջապահության նախարարությանն է տրամադրել բոլոր լրագրողների ցուցակները, աշխատակիցները լրագրողներից հետաքրքրվել են նրանց առողջական վիճակի մասին ու առաջարկել գնալ թեստավորման․

«Որքանով տեղյակ եմ, գրեթե բոլորը հրաժարվել են թեստավորումից»։

Աղբյուր` Փաստինֆո