Փաստ ինֆո

Քրեական գործն ի սկզբանե շատ թերություններ է ունեցել, որոնցից յուրաքանչյուրը բավարար էր, որ քրեական հետապնդում չիրականացվի և կալանքը չկիրառվի։ Այս մասին հրավիրված ասուլիսին ասել է Արմեն Թավադյանի պաշտպան Հովհաննես Խուդոյանը։ 

«Այնպես ստացվեց, որ երկու անգամ կալանքի միջնորդությունը քննարկվեց մի դատավորի կողմից, որի անունն իր մասին շատ բան է ասում։ Այդքանով սահմանափակվեմ։ Միշտ պնդել ենք, որ այդ հիմքերը բացակայում են թե՛ կալանավորման, թե՛ քրեական հետապնդման։ Ավելի հետաքրքիր ստացվեց, երբ ծանոթացանք գործի նյութերին և տեսանք, թե ոստիկանության կողմից հրապարակված տեսանյութն ինչ տեսանյութերից է մոնտաժվել, այդ տեսանյութերի ամբողջական բովանդակությանը ծանոթացանք և տեսանք, որ այդ տեսանյութերն իրականում լրիվ հակառակ բանն են ապացուցում, ինչը, բավականին պրոֆեսիոնալ, բայց անբարեխիղճ մոնտաժի արդյունքում փորձել էր հանրությանը ներկայացվել այլ կերպ »,- ասաց Խուդոյանը՝ նշելով, որ հետագայում դռնբաց դատական նիստերին կանդրադառնան այդ հարցերին և այդ տեղեկատվությունը հասանելի կդարձվեն։

Խուդոյանի խոսքով՝ կհետևեն այն մարդկանց ռեակցիային, ովքեր այս ընթացքում, խախտելով անմեղության կանխավարկածը, խախտելով բոլոր սկզբունքները, նաև՝ բարոյականության սահմաններն անցնելով, իրենց թույլ են տվել կարծիք արտահայտել։ Վերջինս նշեց, որ քրեական գործով առաջիկայում սպասվում են զարգացումներ։

Հարցին, թե արդյո՞ք պատրաստվում են հանցագործության մասին հաղորդում ներկայացնել, Խուդոյանը նշեց, որ դա Դատախազության լիազորությունների շրջանակներում է՝ իրենց ենթակայության վարույթներում հանցագործության հատկանիշներ հայտնաբերելիս պատշաճ իրավական ընթացք տալ ։ Նա նշեց, որ գուցե որոշ ժամանակ անց այդ հարցը բարձրացնեն։

«Չեմ պնդում, որ մենք վաղը հաղորդում ենք ներկայացնելու՝ ԱԱԾ, բայց այդ հարցն անտեսված չի մնալու»,- նշեց Խուդոյանը։

«Ինչքանով որ տեղյակ եմ, այսօր էլ Դատախազությունում պետք է քննարկում լինի կամ գուցե եղել է արդեն, քրեական գործի ճակատագիրը որոշելու։ Այս ընթացքը ենթադրում է, որ գործը պետք է մեղադրական եզրակացությամբ գնա դատարան»,- ասաց Խուդոյանը՝ նշելով, որ հույս ունի, որ Դատախազության գործընկերներն այնքան հեռատես կլինեն, որ նման որակի, մակարդակի քրեական գործը չեն ուղարկի դռնբաց դատական քննության։

«Անձնական շփման ընթացքում դատախազին նշել եմ, որ ակնկալում եմ, որ այս գործով պետք է շուտափույթ կարճում լինի, որովհետև հակառակը դուրս է գալիս ցանկացած տրամաբանությունից և մեր գնահատմամբ՝ հանցավոր գործունեություն է՝ իրավապահ մարմինների կողմից, որովհետև ակնհայտորեն բացակայում են հիմքերը քրեական ՝ հետապնդում իրականացնելու»,- ընդգծեց Խուդոյանը։

Աղբյուր` Փաստինֆո