Փաստ ինֆո

Այսօր քննարկում է տեղի ունեցել, թե ինչու բանկային համակարգը չի հայտարարում տոտալ վարկային արձակուրդ, և բերվել է փաստարկ, որն ըստ իս հիմնավոր է։ Բանկերն ասում են ենթադրենք 100 հաճախորդ կա, որոնցից 80-ը կամ 85-ը պարտաճանաչ է, մենք նրանց հետ հատ-հատ կքննարկենք խնդիրը ու հարցը կլուծենք, սակայն կան նաև 15 անպարտաճանաչ հաճախորդներ, որոնք միշտ խնդիր ունեն։ Այս մասին այսօր Ազգային ժողովի հատուկ նիստում ասաց ՀՀ վարչապետ Նիկոլ Փաշինյանը։

Վարչապետն ընդգծեց, որ համոզված է, դեպք չի լինի, երբ բանկերը համաձայնության չգան իրենց պարտաճանաչ հաճախորդների հետ։

Անդրադառնալով հարցին, արդյոք Կառավարությունը աջակցություն է ցուցաբերելու տնտեսավարողներին, ովքեր հանրային սննդի օբյեկտներ ունեն և հնարավոր է այս ընթացքում հաճախորդներ չունենալով պայմանավորված փակվեն, սակայն վարձակալության պայմանագրերի խնդիրը կա, Փաշինյանն ասաց. «Մեր ընդհանուր պատկերացումն այն է, որ պետք է միջոցառումների արդյունքում պետության ֆիսկալ քաղաքականությունը չխաթարվի։ Եթե պետությունը պետք է գործառույթներ իրականացնի, ապա պետք է գեներացնի եկամուտներ։ Գիտակցու՞մ ենք արդյոք, որ տնտեսվարողները կարող են այս ֆորսմաժորային իրավիճակի պատճառով ունենալ դժվարություններ իրենց ֆիսկալ պարտավորությունները կատարելու առումով, այո, գիտակցում ենք, և դրա համար քննարկում ենք ու կքննարկենք միջոցներ, թե ինչպես աջակցենք այդ մարդկանց, որպեսզի իրենց հարկային պարտավորությունները կատարեն»։

Վարչապետի գնահատմամբ, ճգնաժամը որքան խնդիրներ է ստեղծելու, այնքան էլ «ազատելու է պետության ձեռքերը», որպեսզի հասանելի ֆինանսական միջոցներ ներգրավվեն ու Հայաստանում «դուխով» այնպիսի կապիտալ ծրագրեր իրականացվեն, որոնց վերաբերյալ գուցե մեկ տարի առաջ մտավախություն կար։

Աղբյուր` Փաստինֆո