Փաստ ինֆո

«Փաստինֆո»-ի տեղեկություններով՝ ՀՔԾ-ն հապճեպ նոր միջնորդություն է ներկայացրել «Մարտի 1»-ի գործով քննչական խմբի նախկին ղեկավար Վահագն Հարությունյանի նկատմամբ որպես խափանման միջոց կալանավորումն ընտրելու վերաբերյալ, որը մակագրվել է դատավոր Վահե Միսակյանին։ Քննիչի միջնորդությունը քննարկելու համար հրատապ նիստ է հրավիրվել, որը տեղի է ունենում Ավանի նստավայրում

Ինչպես արդեն հայտնել ենք Ռուսաստանի իրավապահներն այսօր վերացրել էին Վահագն Հարությունյանի ձերբակալումը և նրան ազատ արձակել։

Վ.Հարությունյանի՝ Ռուսաստանում ձերբակալվելու մասին հայտնի էր դարձել մարտի 15-ին, սակայն մեկ օր անց նա ազատ արձակվեց։ Ճիշտ է, Վ.Հարությունյանը 2018 թվականի հոկտեմբերից պաշտոնապես գտնվում է հետախուզման մեջ, սակայն նրա նկատմամբ ընտրված խափանման միջոց չկա. վերաքննիչ քրեական դատարանը նախկինում մերժել էր նրան կալանավորելու ՀՔԾ քննիչի միջնորդությունը։

Հիշեցնենք, որ Վահագն Հարությունյանը որպես մեղադրյալ է ներգրավվել ՀՀ ՔՕ 38-349 հոդվածի 3-րդ մասի 1-ին կետով (ապացույցներ կեղծելուն հանցակցելը, որը կատարվել է ծանր կամ առանձնապես ծանր հանցագործությունների վերաբերյալ գործերով), 308–րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ) եւ 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով): Նա հայտարարել է, որ չի ընդունում առաջադրված մեղադրանքը՝ այն որակելով ապօրինի եւ պատրաստակամություն հայտնել ընդհատել Ռուսաստանում իր բուժումն ու վերադառնալ Հայաստան, եթե Հայաստանի իրավապահները վերացնեին հետախուզումը, սակայն հետախուզումը չվերացվեց։

«Փաստինֆո»-ի տեղեկություններով՝ դատական նիստը նշանակվել է այսօր՝ ժամը 22-ին ։

Աղբյուր` Փաստինֆո