Փաստ ինֆո

«Անգամ իբրեւ թե մարդու իրավունքների վերաբերյալ զգայուն գրառումներ եւ գործունեություն ծավալող անձինք հանիրավի թիրախավորել են տվյալ կնոջը եւ նրա շուրջ ստեղծել են ատելության բավական թիրախավորված շրջան, ինչն անընդունելի է մարդու իրավունքների տեսանկյունից»,- «Փաստինֆո»-ի հետ զրույցում նման կարծիք հայտնեց իրավապաշտպան Զարուհի Հովհաննիսյանը՝ անդրադառնալով կորոնավիրուսով վարակված Էջմիածնի բնակչուհու դեմ ուղղված ատելության արշավին, որի ականատեսը եղանք անցած մի քանի օրերին սոցցանցերում: Արշավին փաստացի միացել էր նաեւ Խիզախ կին մրցանակակիր Լյուսի Քոչարյանը, որը Ֆեյսբուքում գրել էր. «Կներեք էլի, որ ասեմ, որ այդ կինն անպատասխանատու, խոզ տականք ա, շատ կոպիտ կհնչի՞։ Ինձ թվում ա՝ ոչ այնքան։ Տեսնես՝ ոնց ա իրեն զգում։ Ես, օրինակ, ամոթից ու նեղվածությունից գետինը կմտնեի։ Ասենք կաղերսեի գետնին բացվել ու կուլ տալ ինձ»։

Զարուհի Հովհաննիսյանի խոսքով, անձին թիրախավորելը չի նվազեցնում համակարգի կողմից թերացումներն ու անհրաժեշտ գործողությունների կարեւորությունը, որը տվյալ իրավիճակում, ըստ իրավապաշտպանի, առկա է: « Նաեւ ինձ հասած տեղեկություններով, հնարավոր չէ, որ անձը, ամբողջովին տեղեկացված լինելով իր հիվանդության մանրամասների մասին եւ դրանից բխող բոլոր հետեւանքների վերաբերյալ, ցանկություն ունենա իր հարազատներին նման վտանգավոր հիվանդություն փոխանցել: Այսինքն, այստեղից հետեւում է, որ նա կամ լիարժեք տեղեկացված չի եղել իր առողջական վիճակի մասին կամ իրազեկ չի եղել դրա հետեւանքների մասին»,-ասաց իրավապաշտպանը։

Հիշեցնենք, որ խոսքը Իտալիայից վերադարձած էջմիածնեցի կնոջ մասին, է որը Էջմիածնում վարակի տարածման աղբյուր է դարձել: Կինը առողջական խնդիրներով դիմել է Էջմիածնի հիվանդանոց, որի ինֆեկցիոն բաժանմունքի վարիչը Էջմիածնի քաղաքապետի մայրն է: Կնոջ մոտ երկկողմանի թոքաբորբ է հայտնաբերվել, սակայն դա նրան չի խանգարել ՝ կազմակերպել որդու նշանադրությունը: Էջմիածնի քաղաքապետ Դիանա Գասպարյանը հաստատել է, որ իր մորը հեռախոսով զգուշացրել են, որ Իտալիայից ժամանած քաղաքացու մոտ թոքաբորբ կա եւ նա էլ հեռախոսով ասել է, որ հիվանդը պետք է դիմի Երեւան ՝

«Նորք» ինֆեկցիոն հիվանդանոց։ Փաստացի քաղաքային հիվանդանոցը համապատասխան միջոցառումներ չի ձեռնարկել պոտենցիալ վարակակիր կնոջը մեկուսացնելու համար, բավարարվել է միայն հորդորով՝ դիմել Երեւան: Արդյո՞ք այս օղակը չի թերացել: «Այնքանով, որքանով մենք տիրապետում ենք տեղեկատվությանը, կարծում եմ, բուժհաստատությունը բավարար քայլեր չի ձեռնարկել, որովհետեւ, եթե մենք դա դիտարկում ենք որպես վտանգավոր համաճարակ, կարծում եմ, որ անձը պետք է ինքնագիտակցության վրա թողնված չլիներ եւ բժշկական հաստատությունը պետք է ամեն կերպ թե տեղեկացներ, թե քաղաքային մարմիններին որեւէ սանկցիա իրականացնելու ազդակ հաղորդեր՝ հսկողություն սահմանել , թեկուզ, եթե տանն է մեկուսացված անձը՝ հսկողություն սահմանել կամ տեղափոխել որեւէ վայր, որովհետեւ նախկին դեպքերում մենք ունեցել ենք կոնկրետ անձի եւ նրա հետ շփված անձանց տեղափոխում այլ վայր, ոչ թե թույլ է տրվել անձին գտնվել իր գիտակցության կամ իր պատկերացրած մեկուսացման սահմաններում»,-ասաց Զարուհի Հովհաննիսյանը՝ հիշեցնելով իրանի քաղաքացու նախադեպը:

Ինչ վերաբերում է դիտարկմանը, որ տվյալ իրավիճակում, թիրախավորվեց այդ կինը, որը ըստ էության տեղեկացված չի եղել, որ կորոնավիրուս ունի, քանի որ չի թեստավորվել, մինչդեռ, օրինակ վարչապետի տիկին Աննա Հակոբյանը, որը Բրազիլիայից վերադառնալուց հետո ամուսնու հետ մասնակցում էր սահմանադրական հանրաքվեի քարոզարշավին եւս չի իմացել, արդյո ՞ք վիրուսակիր է, թե ոչ, կամ Վայքի բնակիչը, որը, ինչպես պարզվեց, կորոնավիրուս է ունեցել եւ քարոզարշավի ընթացքում շփվել է վարչապետ Փաշինյանի հետ, շփվել է իր հետ եւ եղել, Զարուհի Հովհաննիսյանն արձագանքեց. «Իհարկե, եթե մարդիկ տեղեկացված չեն իրենց հիվանդության վերաբերյալ, նրանք հանգիստ շրջում են՝ համարելով, որ միգուցե հարբուխ է կամ սովորական թոքաբորբ է կամ կարող է հաղթահարվել որեւէ կերպ: Այս դեպքում , իհարկե, անձը կարող է գործել մեր պատկերացրած միջի վիճակագրական քաղաքացու նման, որոնցից մեկը նաեւ մենք ենք »:

Զարուհի Հովհաննիսյանի խոսքով, խնդիրը համակարգային լինելուց բացի, նաեւ մեր մտածողության խնդիրն է, երբ շատ հաճախ հիվանդություններին լրջորեն չենք վերաբերվում : «Բավական լուրջ հարբուխով հասարակության մեջ շրջում ենք, գնում ենք հանդիպումների, երեխաներին ուղարկում ենք դպրոց ու մանկապարտեզ՝ չմտածելով, որ իր կողքերին կվարակի: Դա մեր մշակույթի մեջ առկա է, սա մեզ համար իհարկե, առկա է, որ փոխենք մեր մշակույթը, սակայն կնոջը թիրախավորել եւ նրա շուրջ ատելության օղակ ստեղծել, համարում եմ անընդունելի: Ինքս արձագանքել եմ եւ ստացել եմ շատ կտրուկ պատասխան կոնկրետ Լյուսի Քոչարյանից, որ ինքն իր անհատական տեսակետն է տարածում , սակայն դիտարկելով, որ նա նաեւ կարծիք ձեւավորող եւ տարածող է, կրծում եմ, որ պետք է մի փոքր չափավորի իր տեսակետները՝ մարդու իրավունքների սկզբունքներին համապատասխան, ինչը նաեւ մարդու անձնական կյանքի գաղտնիության իրավունքն է եւ մարդու նկատմամբ ատելություն չտարածելը»,-շեշտեց իրավապաշտպանը:

Զարուհի Հովհաննիսյանը դատապարտեց կորոնավիրուսով հիվանդ կնոջ լուսանկարների տարածումը սոցցանցերում, ընդգծեց, որ մարդու առողջության գաղտնիության իրավունքը Սահմանադրությամբ է ամրագրված եւ այդ սկզբունքը պահպանվում է թե ՄԻԱՎ-ով հիվանդ մարդկանց պարագայում, թե հոգեկան առողջության հետ խնդիր ունեցողների. «Հատկապես լրագրողները նման բան անելու իրավունք չունեն, որովհետեւ նրանք սովորում են, թե ինչպես պետք է լուսաբանել մարդու իրավունքների խնդիրները»:

Իրավապաշտպանը միմյանց նկատմամբ ավելի զգայուն եւ հոգատար լինելու կոչ արեց՝ հորդորելով իրար մեջ չգտնել պոտենցիալ հանցագործների:

Աղբյուր` Փաստինֆո