Փաստ ինֆո

Երեկ երեկոյան, երբ ես թեստ պետք է հանձնեի, ինձ մոտ նույնպես ջերմություն կար 37-37,1 աստիճան, և նաև այդ էր պատճառը, որ որոշեցինք թեստ հանձնել։ Այս մասին այսօր ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը։

Վարչապետը քաղաքացիներին ասաց, որ ջերմություն արձանագրվելու դեպքում չշտապեն հետևություններ անել. «Վերջին օրերին առավոտից երեկո ջերմություն էի չափում, ջերմություն չունեի, երեկ երեկոյան, երբ ստացանք լուրը, որ Վայքում շփում եմ ունեցել կորոնավիրուսը հաստատված պացիենտի հետ, նորից ջերմությունս չափեցի և 37,1 ջերմություն գրանցվեց»։

Նա հայտնեց՝ որոշել է խրախուսական պատվոգրով պարգևատրել առաջին ախտորոշված պացիենտին, որն իր բարձր գիտակցությամբ լուրջ ծառայություն մատուցեց Հայաստանին ու օգնեց, որ վարակը շատ չտարածվի։
Խոսելով Կառավարությունում տեղի ունեցող քննարկումների մասին, Փաշինյանն ասաց. «Այս քննարկումները կարևոր են, որպեսզի բոլորս հասկանանք իրավիճակն ու քայլերի համարժեքությունը, համաչափությունն ու արդյունավետությունը։ Հնարավորություն կունենանք արձագանքել նաև հնարավոր քննադատություններին, որպեսզի հանրությունը հասկանա ինչ իրավիճակ է»։

Նա ընդգծեց, որ Հայաստանը պետք է հաղթահարի ոչ միայն կորոնավիրուսը, այլև ակնկալվող տնտեսական դժվարությունները. «Այսօրվանից պետք է տրամադրվենք, որ թե՛ առողջապահական համակարգի, թե՛ օրենսդրության, թե՛ քաղաքացիական համերաշխության, թե՛ազգային միասնության առումով պետք է հստակ դնենք, որ այս իրավիճակից պետք է դուրս գանք շատ ավելի ուժեղացած, շատ ավելի ամուր դիրքերով»։

Վարչապետը նաև հայտնեց, որ ԱԱԾ տնօրենի ժպ-ն իրեն զեկուցել է, որ որ եթե նույնիսկ մի ամիս շարունակ հանրապետություն ոչ մի բան չներկրվի, սննդամթերքի պակաս չի լինի։

Աղբյուր` Փաստինֆո