Փաստ ինֆո

Եվ այսպես, այսօրվանից, այսինքն՝ 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 09:00-ն ներառյալ՝ ժամկետով ՀՀ ամբողջ տարածքում հայտարարված է արտակարգ դրություն։ Որոշումը կառավարությունն ընդունել է միաձայն։

Այս որոշման հետ կապված երկրի վարչապետի ֆեյսբուքյան էջում բազմաթիվ են մեր ժողովրդի արձագանքներն, ընդ որում, ուշագրավն այն է, որ նրանց հիմնական մասը գրում է լատինատառ հայերենով: Ճիշտ կլիներ, վարչապետի էջում արգելվեր հայերենի հանդեպ նման վերաբերմունքի ցանկացած դրսևորում՝ այդ կերպ նաև կխթանվեր մայրենի լեզվի կիրառական արժեքը, գործածումը համացանցում: Բայց այս մասին մեկ այլ անգամ ավելի հանգամանալից կգրեմ:

Իսկ մեր հայրենակիցների այսօրվա մեկնաբանությունների ուսումնասիրությունը՝ կապված արտակարգ դրության հայտարարման հետ, բավական հետաքրքիր են, ընդ որում, նաև նրանով, որ որևէ քաղաքացի հարց չի բարձրացնում, թե ինչու՞ արտակարգ դրության սահմանման համատեքստում բառ անգամ չի ասվում հանրաքվեի հետագա ճակատագրի մասին, ի՞նչ եղավ հանրաքվեն, ե՞րբ է այն տեղի ունենալու և արդյո՞ք տեղի ունենալու է… Այս հարցերն իրականում չեն հետաքրքրում մեր հայրենակիցներին:

Թեպետ դեռ ընդամենը մի քանի օր է անցել այն օրերից, երբ մարզային հանրահավաքներով կամ՝ թավշյա հեղափոխության ոգեկոչման , հոգի կանչելու արարողություններով Նիկոլ Փաշինյանը և ողջ քպական կորպուսը համոզում էին, թե՝ ժողովուրդը, ժողովու՛րդն է պահանջում սահմանադրական փոփոխությունների հանրաքվե իրականացնել:

Արդյունքում, ի՞նչ է ստացվում, ողջ համացանցում այս թեման հուզում-անհանգստացնում է մե՛կ Երևանի մամուլի ակումբի նախագահ Բորիս Նավասարդյանին, մեկ էլ՝ Իմ քայլը» խմբակցության պատգամավոր Արուսյակ Ջուլհակյանին. նրանցից առաջինը ֆեյսբուքում էր այս թեման բարձրացրել, իսկ երկրորդը՝ ԱԺ-ում այս առումով հարց ուղղեց Նիկոլ Փաշինյանին:

Ըստ Բ. Նավասարդյանի՝ ,,հանրաքվեի վերաբերյալ ավելի կոնկրետ եւ հասցեագրված դրույթներ պիտի լինեն արտակարգ դրության մասին որոշման մեջ: Ճիշտ է, անուղղակիորեն ենթադրվում է, որ պետք է ապրիլի 5-֊ին չկայանա, սակայն ցանկալի է, որ դրա վերաբերյալ առանձին դրույթ լինի: Մասնավորապես, քարոզարշավին նույնպես պետք է անդրադարձ լինի,,:

Մինչ այլ կարծիքներ են հայտնվում, թե՝ քանի որ իրավունքի, սահմանադրության ուժով է հետաձգվելու, ուստիև՝ անդրադարձ չի եղել, Նավասարդյանը մնում է իր տեսակետին՝ ,,օրենքի ուժով շատ բաներ են կարգավորվում, բայց ՍԴ-֊ի վերաբերյալ որոշումը պետք է մանրամասնվեր եւ մեկնաբանվեր կարգավորման այն դրույթներով (տվյալ դեպքում Հանրաքվեի մասին օրենքի),,:

Ինչ վերաբերվում է Ա. Ջուլհակյանի հարցին, ապա այս դեպքում պատասխանողը վարչապետ Փաշինյանն էր, որն էլ հայտնեց այն, ինչի մասին իսպառ մոռացել էին հպարտ քաղաքացիները:

Ըստ այդմ՝ «ՀՀ օրենսդրության համաձայն՝ արտակարգ դրության պայմաններում հանրաքվե տեղի ունենալ չի կարող: Հանրաքվեն տեղի կունենա արտակարգ դրության ավարտից հետո ոչ շուտ, քան 50 և ոչ ուշ, քան 65 օր հետո: Հանրաքվեի գործընթացը կսկսվի այն կետից, որտեղ, որ ավարտվել էր»,- ասաց Փաշինյանը:

Հիշեցնենք, որ Սահմանադրության փոփոխությունների հանրաքվեով առաջարկվում է դադարեցնել Սահմանադրական դատարանի նախագահ Հրայր Թովմասյանի և դատարանի 6 անդամների պաշտոնավարումը: Սահմանադրության փոփոխությունների հանրաքվեն պետք է տեղի ունենար ապրիլի 5-ին: Նախընտրական քարոզարշավը մեկնարկել էր փետրվարի 17-ին, սակայն մարտի 13-ից այն, ըստ էության դադարեցվեց՝ կորոնավիրուսի ահագնացող տեմպերի պատճառով, որը խթանող շատ կարևոր հանգամանք էր հանրաքվեի քարոզարշավը:

Իրականում, այն, որ մարդկանց, հանրությանը, մեր ժողովրդին մեծ հաշվով չի հետաքրքրում փաստացի՝ «7 հոգու աշխատանքից ազատելու» սարքովի հանրաքվեն, որ այն ժողովրդի անունից ներկայացնելը «կատալիզատորության» արդյունք է, հստակ է:

Կարդացեք վարչապետին ուղղված հարյուրավոր հարցերը, հանրաքվեին վերաբերող ոչ մի հարց չեք գտնի: Մարդկանց հետաքրքրում է աշխարհում ահագնացող կորոնավիրուսը, դրա հայաստանյան տարածումը, իրենց դժվար կյանքն ու կենցաղը կորոնավիրուսի օրերին և դրանից հետո:

Հեղինակ Մարինե Մինասյան

Աղբյուր` Փաստինֆո